लोकप्रिय आवरणमा विवादास्पद कार्य क्षम्य हुन सक्दैन : एमाले नेता सूर्य थापा

काठमाडौं, कात्तिक ५ । नेकपा एमालेका नेता सूर्य थापाले लुम्बिनी विकास कोषको उपाध्यक्षमा आनी छोइङ डोल्माको नियुक्तिलाई लिएर प्रश्न उठाउनुभएको छ। उहाँले सार्वजनिक पदमा नियुक्ति, लुम्बिनीको गरिमा र आनीसँग जोडिएका विवादका विषयमा सामाजिक सञ्जालमार्फत आफ्नो धारणा सार्वजनिक गर्नुभएको हो। थापाले आनी छोइङ डोल्माले गाउनुभएको चर्चित गीत ‘फूलको आँखामा फूलै संसार’ को लोकप्रियता उल्लेख गर्दै लोकप्रिय व्यक्तित्वसँग जोडिएका विवादलाई पनि गम्भीर रूपमा लिनुपर्ने धारणा राख्नुभएको छ। “लोकप्रिय आवरणमा विवादास्पद कार्य क्षम्य हुन सक्दैन,” थापाले लेख्नुभएको छ। उहाँले लुम्बिनी विकास कोषजस्तो महत्त्वपूर्ण संस्थाको नेतृत्वमा नियुक्ति गर्दा सम्बन्धित व्यक्तिको पृष्ठभूमि र सार्वजनिक भूमिकालाई ध्यान दिनुपर्ने बताउनुभएको छ। लुम्बिनीको पवित्रता र राष्ट्रिय हितमा प्रतिकूल असर पर्ने गतिविधिमा संस्थाको पद प्रयोग हुन नहुने उहाँको भनाइ छ। थापाले आनी छोइङ डोल्मासँग जोडेर सम्पत्ति शुद्धीकरण र नागरिकतासम्बन्धी विषयसमेत उठाउनुभएको छ। यस्ता विषयमा कानुनी प्रक्रिया र छानबिनको महत्त्व औँल्याउँदै उहाँले सम्बन्धित व्यक्तिले कानुनको सामना गर्नुपर्ने धारणा व्यक्त गर्नुभएको छ। उहाँले लुम्बिनी विकास कोषको पदलाई ‘फ्री तिब्बत’ अभियान वा नेपालको परराष्ट्र नीतिप्रतिकूल गतिविधिका लागि प्रयोग गर्न नहुने पनि उल्लेख गर्नुभएको छ। यस्ता गतिविधिबारे उठेका प्रश्नको निष्पक्ष छानबिन र तथ्यका आधारमा निरूपण आवश्यक हुने देखिन्छ। ‘यस पवित्र सम्पदाको पदलाई फ्रि तिब्बत वा अन्य नेपालको विदेश मामिला प्रतिकूल चलखेलमा प्रयोग गर्ने खराने कठपुतली सरकार त जान्छ नै, तर यसको कठोर मूल्य नेपाल राष्ट्र, लुम्बिनी र आनी स्वयंले चुकाउनुपर्ने हुन्छ’, उहाँले लेख्नु भएकाे छ । थापाले आनी छोइङ डोल्मालाई विदेशी स्वार्थसँग जोडिएको ‘टीओबी’ को स्वार्थमा प्रयोग हुन नहुने भन्दै विवादबाट टाढा रहन सुझावसमेत दिनुभएको छ। साथै, विवादित आर्थिक कारोबारले नेपालको अन्तर्राष्ट्रिय वित्तीय छविमा असर पार्न सक्ने चिन्ता व्यक्त गर्नुभएको छ। ‘आनीले कानुनको सामना त गर्नुपर्छ नै, अझ टिओबी को स्वार्थमा गोटी बनेर अनावश्यक विवादमा पर्ने काम गर्नुहुँदैन, उनका जस्तै विवादित आर्थिक कारोबारले देशलाई ग्रेबाट छिट्टै कालोसूचीमा पार्न चाहनेहरूलाई सजिलो बनाइदिनु हुँदैन’, थापाले भन्नुभएकाे छ ।