रास्वपा संघीयता विरोधी पार्टी होइन : मनिष झा

राष्ट्रिय स्वतन्त्र पार्टी (रास्वपा) का सांसद मनिष झाले आफ्नो पार्टी संघीयता विरोधी नभएको बताएका छन् । उनले संघीय संरचनालाई थप व्यवस्थित, चुस्त, दुरुस्त र प्रभावकारी बनाउनुपर्ने पक्षमा रास्वपा रहेको स्पष्ट पारेका हुन् । जनकपुरमा आयोजित एक कार्यक्रमलाई सम्बोधन गर्दै सांसद झाले प्रदेशसभा र प्रदेश परिषद्को अवधारणालाई अघि बढाएर संघीयतालाई थप मजबुत बनाउने पार्टीको सोच रहेको बताए । ‘हामी संघीयताको विरोधी होइनौँ, बरु हामी संघीयतालाई अझ व्यवस्थित, चुस्त र दुरुस्त बनाउन चाहन्छौँ । हामी प्रदेशसभा र प्रदेश परिषद्को परिकल्पनातर्फ जान चाहन्छौँ,’ उनले भने । उनले राजनीतिक दलभित्र आपसी विवाद र आरोप–प्रत्यारोपमा अल्झिनुभन्दा अध्ययन, विचार र संस्कारमा आधारित राजनीतिक अभ्यासलाई प्राथमिकता दिनुपर्नेमा जोड दिए । ‘आफ्नै–आफ्नै बीचमा झगडा गर्न थालियो भने, एकअर्कामाथि झुटा आरोप–प्रत्यारोप लगाउन थालियो भने हामी कहीँ पुग्न सक्दैनौँ,’ झाले भने, ‘हामीले एउटा सुसंस्कृत राजनीतिक अभ्यास, अध्ययन, विचार र संस्कारमा आधारित राजनीति गर्दै अगाडि बढ्नुपर्छ ।’ सांसद झाले मधेसमा गत निर्वाचनमा रास्वपाले उल्लेख्य मत प्राप्त गरेको उल्लेख गर्दै आगामी स्थानीय तहको निर्वाचनमा पनि एकजुट भएर पार्टीको पक्षमा माहोल बनाउन आग्रह गरे । उनले मधेसी समुदायभित्र आपसी विवाद गर्ने तथा एकअर्कामाथि आरोप–प्रत्यारोप लगाउने प्रवृत्ति अन्त्य गर्नुपर्ने बताए । राजनीतिक उद्देश्य हासिल गर्न आपसी एकता, वैचारिक स्पष्टता र सुसंस्कृत राजनीतिक व्यवहार आवश्यक रहेको उनको भनाइ थियो । संघीयताबारे थप व्याख्या गर्न आवश्यक नरहेको उल्लेख गर्दै झाले यसको प्रभावकारिता बढाउने विषयमा केन्द्रित हुनुपर्ने बताए । उनले पार्टीका नेता तथा कार्यकर्तालाई आपसी मतभेदभन्दा माथि उठेर विचार र राजनीतिक संस्कारका आधारमा अघि बढ्न आग्रह गरे ।