भूमिहीनको समस्या समाधान र सहकारीपीडितको रकम फिर्ता गर्ने काम तीव्र बनाउँछौँ : मन्त्री रावल

भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले दशैँ–तिहारपछि भूमिहीन नागरिकको समस्या समाधान र सहकारीपीडित बचतकर्ताको रकम फिर्ता गर्ने प्रक्रियालाई तीव्रता दिने बताएकी छन् । सोमबार चितवनमा सञ्चारकर्मीसँग कुरा गर्दै मन्त्री रावलले भूमिहीन नागरिक र सहकारीपीडितका समस्या सरकारको प्राथमिकतामा रहेको बताएकी हुन् । दुवै क्षेत्रका समस्या समाधानका लागि आवश्यक कानुनी तथा नीतिगत जटिलता हटाउँदै काम अघि बढाइएको उनले जानकारी दिइन् । मन्त्री रावलका अनुसार सरकारले समस्याग्रस्त घोषणा गरेका सहकारीका बचतकर्ताको रकम फिर्ता गर्ने प्रक्रिया सुरु भइसकेको छ । लामो समयदेखि बचत फिर्ता नपाएर पीडामा रहेका नागरिकको रकम जतिसक्दो छिटो फिर्ता गर्नुपर्ने उनको भनाइ छ । ‘सहकारीमा बचत डुबेका बचतकर्ताको रकम फिर्ता गर्ने प्रक्रिया सुरु भइसकेको छ । सरकारले समस्याग्रस्त घोषणा गरेका सहकारीको बचत फिर्ता गर्ने काम अघि बढिरहेको छ । तर यसलाई अझ तीव्रता दिनुपर्ने आवश्यकता छ,’ उनले भनिन् । भूमिहीन नागरिकको समस्या समाधानमा बाधक बनेका कानुनी जटिलता अध्यादेशमार्फत हटाइएको उल्लेख गर्दै मन्त्री रावलले अब समस्या समाधानको कामलाई तीव्र गतिमा अघि बढाइने बताइन् । यसअघि कानुनी व्यवस्थाका कारण भूमिहीन नागरिकलाई उनीहरू बसोबास गरिरहेको स्थानमै व्यवस्थापन गर्न कठिनाइ हुँदै आएको उनको भनाइ छ । भूमिहीन नागरिकमा आफूहरू बसिरहेको स्थानबाट हटाइने वा डोजर चलाइने हो कि भन्ने त्रास रहेको उल्लेख गर्दै उनले सरकारले गरिरहेका काम र आगामी योजनाबारे उनीहरूलाई स्पष्ट जानकारी गराउन आवश्यक रहेको बताइन् । ‘अहिले आफूहरू बसिरहेको ठाउँबाट उठाइदिने हो कि, डोजर लगाइदिने हो कि भन्ने त्रास भूमिहीन नागरिकमा देखिएको छ । यस्तो त्रासपूर्ण वातावरण अन्त्य गर्न पनि हामी उनीहरूलाई सरकारले के काम गरिरहेको छ र उनीहरूको हकमा के–कस्ता काम अघि बढेका छन् भन्ने स्पष्ट पार्न चाहन्छौँ,’ उनले भनिन् । मन्त्री रावलले दशैँ–तिहारपछि भूमिहीनको समस्या समाधान गर्ने कामलाई अझ आक्रामक रूपमा अघि बढाइने बताइन् । यो काम चितवनमा मात्र सीमित नरहने र देशभर तीव्रताका साथ अघि बढाइने उनको भनाइ छ । ‘अब दशैँ–तिहारपछि भूमिहीन नागरिकका समस्या समाधान गर्ने कामलाई अझ आक्रामक रूपमा अघि बढाएको देख्नुहुनेछ । यो काम चितवनमा मात्र सीमित रहने छैन, देशैभरि तीव्रताका साथ अघि बढाइनेछ,’ उनले भनिन् । सरकार समस्या समाधानको सुरुवाती चरण पार गरेर कामलाई तीव्रता दिने दोस्रो चरणमा प्रवेश गरेको उल्लेख गर्दै उनले आगामी दिनमा थप कानुनी तथा नीतिगत समस्या देखिए तिनलाई पनि सुधार गर्दै जाने बताइन् । सहकारीसम्बन्धी समस्यामा पनि सरकारले काम गरिरहेको र यसअघि जारी गरिएको अध्यादेशमार्फत केही कानुनी अस्पष्टता हटाउने प्रयास गरिएको उनले जानकारी दिइन् । सहकारीका विषयमा कसले के गर्ने भन्ने स्पष्टता आवश्यक रहेकाले त्यसलाई सम्बोधन गर्दै अघि बढिएको उनको भनाइ छ । मन्त्री रावलले सरकार जनताका समस्या सुन्न र समाधानका लागि पहल गर्न जनताकै बीचमा पुग्नुपर्ने मान्यताअनुसार आफू चितवन आएको बताइन् । भ्रमणका क्रममा भूमिसम्बन्धी समस्या भोगिरहेका नागरिक र सहकारीपीडित बचतकर्तासँग भेटेर उनीहरूका गुनासा, सुझाव तथा समस्या समाधानको अवस्थाबारे जानकारी लिने उनको उद्देश्य रहेको छ । मन्त्री रावलले चितवनमा भूमिहीन नागरिक तथा सहकारीपीडित बचतकर्तासँग छलफलसमेत गरेकी छन् ।