नेपाल–भारत सीमा सुरक्षा बैठक सुरु, के–के विषयमा हुँदैछ छलफल?

सशस्त्र प्रहरी र भारतीय सशस्त्र सीमा बल (एसएसबी)को बिचमा सीमा सुरक्षा तथा व्यवस्थापन सम्बन्धी द्विपक्षीय बैठक काठमाडौँमा सुरु भएको छ । बुधबारदेखि सुरु भएको बैठक कात्तिक १३ सम्म चल्नेछ । बैठकमा सहभागी हुन एसएसबीका महानिर्देशक संजय सिंघल आफ्नो प्रतिनिधिमण्डलको नेतृत्व गरेर काठमाडौँ आएका छन् । सशस्त्र प्रहरी महानिरीक्षक नारायदत्त पौडेलले नेपाली प्रतिनिधिमण्डलको नेतृत्व गरेका छन् । सीमा अपराध नियन्त्रण तथा दुई देशका सीमावर्ती सुरक्षा निकायबिच आपसी समन्वय र सहकार्य अभिवृद्धि गर्ने उद्देश्यले सञ्चालन हुँदै आयो यो १०औँ द्विपक्षीय समन्वय बैठक हो । नेपालको तर्फबाट गृह मन्त्रालय, परराष्ट्र मन्त्रालय, नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान विभाग तथा नापी विभागका प्रतिनिधिहरूको सहभागिता रहेको छ । भारतीय पक्षबाट गृह मन्त्रालय, विदेश मन्त्रालय, नेपाल स्थित भारतीय राजदूतावास र सशस्त्र सीमा बलका उच्च पदस्थ अधिकृतहरूको सहभागिता रहेको छ । बैठकमा सीमाको सुरक्षा, सिमानामा हुने अवैध गतिविधि नियन्त्रण, मानव तस्करी तथा लागूऔषध ओसारपसार नियन्त्रण र अवैध हातहतियार नियन्त्रणबारे भएका प्रयासको समीक्षा गरिने सशस्त्र प्रहरी बलका प्रवक्ता (डीआईजी) नेत्रबहादुर कार्कीले जानकारी दिए । द्विपक्षीय बैठकको क्रममा सीमा व्यवस्थापन संयन्त्रले गरेको मार्गदर्शनको आधारमा दशगजाको अतिक्रमण हटाउने, सीमा स्तम्भहरूको संरक्षण, मर्मत सम्भार तथा निर्माण, सीमा क्षेत्रमा हुने आपराधिक गतिविधि नियन्त्रणबारे छलफल हुनेछ । सीमावर्ती क्षेत्रमा बसोबास गर्ने नागरिकसँगको सम्बन्धलाई सुदृढ बनाउन र सशस्त्र प्रहरी बल, नेपाल र सशस्त्र सीमा बल, भारतबिच आपसी सम्बन्ध तथा सहकार्य बढाउनेबारे पनि छलफल हुनेछ । नेपाल–भारत खुला सिमानाको प्रयोग गरी हुन सक्ने तेस्रो मुलुकका नागरिकहरूको अवैध आवागमनलाई कडाइका साथ नियमन गर्ने, सीमा व्यवस्थापनलाई थप चुस्त, प्रभावकारी र आधुनिक बनाउनका लागि उपयुक्त प्रविधिको प्रयोग गर्नेबारे पनि छलफल हुने सशस्त्र प्रहरी प्रधान कार्यालयले जनाएको छ ।