नेपाल प्रहरीको कार्यसम्पादनमा रुपन्देही देशकै सर्वोत्कृष्ट

जिल्ला प्रहरी कार्यालय रुपन्देही नेपाल प्रहरीको कार्यसम्पादन मूल्याङ्कनमा देशभरका जिल्ला प्रहरी कार्यालयमध्ये सर्वोत्कृष्ट बनेको छ। प्रहरी सेवा प्रवाह, कार्यालय सञ्चालन, कार्यकुशलता, व्यावसायिक दक्षता, कानुन कार्यान्वयन तथा अवैध गतिविधि नियन्त्रणलगायतका क्षेत्रमा उत्कृष्ट कार्यसम्पादन गर्दै रुपन्देही प्रहरीले पहिलोपटक ‘पुलिस व्याटन’ प्राप्त गरेको हो। नेपाल प्रहरीको कार्यसम्पादन मूल्याङ्कन (पुलिस व्याटन) २०८३ मा सर्वोत्कृष्ट बनेको रुपन्देही प्रहरीलाई ७१औँ प्रहरी दिवसको अवसरमा पुरस्कृत गरिएको छ। उत्कृष्ट कार्यसम्पादनमा नेतृत्वदायी भूमिका निर्वाह गरेको भन्दै जिल्ला प्रहरी कार्यालय रुपन्देहीका प्रमुख प्रहरी उपरीक्षक (एसपी) जनकबहादुर शाहीलाई नेपाल प्रहरी प्रधान कार्यालयले प्रशंसापत्र प्रदान गरेको छ। प्रहरी दिवस २०८३ को अवसरमा प्रदान गरिएको प्रशंसापत्रमा एसपी शाहीले कार्यालय प्रमुखका रूपमा व्यावसायिकता, निष्ठा, मातहतका प्रहरी कर्मचारीको परिचालन तथा कार्यकुशलतालगायतका क्षेत्रमा उत्कृष्ट भूमिका निर्वाह गरेको उल्लेख छ। नेपाल प्रहरी प्रधान कार्यालय, नक्सालले प्रदान गरेको प्रशंसापत्रमा प्रहरी महानिरीक्षक दानबहादुर कार्कीले शाहीलाई बधाई दिँदै आगामी दिनमा अझ उच्च प्रगतिको कामना गरेका छन्। नेपाल प्रहरीको कार्यसम्पादन मूल्याङ्कनमा उत्कृष्ट हुने जिल्ला प्रहरी कार्यालयलाई प्रदान गरिने ‘पुलिस व्याटन’लाई प्रहरी संगठनभित्र जिम्मेवारी, अनुशासन, कार्यक्षमता र सेवा प्रवाहको गुणस्तर अभिवृद्धि गर्ने सम्मानका रूपमा लिइन्छ। यसले प्रहरी कार्यालयहरूबीच स्वस्थ प्रतिस्पर्धा बढाउनुका साथै नागरिकलाई प्रभावकारी, उत्तरदायी र गुणस्तरीय सेवा प्रदान गर्न प्रोत्साहित गर्ने उद्देश्य राखेको छ।