तीन दशकपछि संयुक्त राष्ट्रसङ्घको सोमालियामा जारी राजनीतिक अभियान अन्त्य

नैरोबी । संयुक्त राष्ट्रसङ्घको सोमालियाका लागि रहँदै आएको राजनीतिक अभियान दुई वर्षे सङ्क्रमणकालपछि शनिबार समाप्त भएको छ । यसले पूर्वी अफ्रिकी राष्ट्रमा तीन दशकभन्दा बढी समयदेखि चलेको संयुक्त राष्ट्रसङ्घको शान्ति निर्माण कार्यको अध्याय बन्द गरेको छ । युएनसोमलाई संयुक्त राष्ट्रसङ्घ सुरक्षा परिषद्ले सन् २०१३ मा स्थापना गरेको थियो। यसले सोमाली अधिकारीहरूलाई दुई दशकभन्दा बढीको द्वन्द्वपछि लोकतन्त्र र कानूनको शासनमा सङ्क्रमणमा सहयोग गर्ने उद्देश्य राखेको थियो । यो सन् १९९५ मा संयुक्त राष्ट्रसङ्घ राजनीतिक कार्यालय सोमालिया (युएनपिएस) को रूपमा सुरु भएको थियो । सन् २०२४ मेमा सोमालियाका राष्ट्रपति हसन शेख मोहमूदले मिसनको म्याद सकिनुअघि नै अक्टोबरमा समाप्त गर्न अनुरोध गरेका थिए । उनले पछि दुई वर्षे सङ्क्रमण अवधिको प्रस्ताव गरेका थिए । सङ्क्रमण अवधिमा युएनसोमलाई संयुक्त राष्ट्रसङ्घ सङ्क्रमण सहायता अभियान सोमालिया (युएनटिएमआइएस) नाम दिइएको थियो। “आज संयुक्त राष्ट्रसङ्घ र सोमालियाबीचको साझेदारीको अन्त्य होइन, बरु एउटा अध्यायको समाप्ति र अर्कोको सुरुवात हो,” युएनटिएमआइएसका अस्थायी प्रमुख तथा संयुक्त राष्ट्रसङ्घका महासचिवका सोमालियाका लागि उपविशेष प्रतिनिधि रेज्डन जेनेङ्गाले वक्तव्यमा भनेका छन् । “ठूला चुनौतीहरू बाँकी छन्, तर युएनटिएमआइएसको समाप्ति सोमालियाले अन्तर्राष्ट्रिय सहयोगको प्रारम्भिक वर्षहरूदेखि गरेको उल्लेखनीय प्रगतिको परिणाम हो,” उनले थपे । मिसनका जिम्मेवारीहरू सोमाली संस्थाहरू वा संयुक्त राष्ट्रसङ्घका सदस्य राष्ट्रका टोलीलाई हस्तान्तरण गरिएको छ । यो अन्त्य अल–कायदासँग सम्बन्धित अल–शबाबले अझै केन्द्रीय सोमालियाको ठूलो भाग नियन्त्रणमा राखेको अवस्थामा आएको हो । दुई दशकदेखि सोमाली सरकारसँग लडिरहेको यस समूहविरुद्ध ठूलो अन्तर्राष्ट्रिय सैन्य अभियान चलाइए पनि स्थिति नियन्त्रणमा आएको छैन । अल–शबाबविरुद्धको लडाइँ अन्तर्राष्ट्रिय सहयोग कटौतीका कारण थप सङ्कटमा परेको अवस्थामा यो घोषणा भएको छ ।