युद्ध सकिने बाटोमा रहेको ट्रम्पको दाबी

काठमाडौं– इरानको रेभुलेसनरी गार्ड सेना (आइआरजिसी) ले हरमुजको अनधिकृत बाटोमा यात्रा गरिरहेका चार तेल ट्याङ्क समातेर विस्फोट गराइएको जनाएको छ । हरमुजमा यसरी आक्रमण भएका अक्टोबर महिनामा मात्र ३५ पटक हो । इरानमा गत फेब्रुअरीमा अमेरिका र इजरायल मिलेर आक्रमण गरेपछि सबै भन्दा धेरै आक्रमण भएको यो पहिलो पटक हो । लामो समयको आक्रमणको बाबजुद अमेरिकी राष्ट्रपति डोनाल्ड ट्रम्पले चाँडो युद्ध अन्त्यको सम्भावना व्यक्त गरेका छन् । उनले स्थानीय रेडियो कार्यक्रममार्फत यो आशय व्यक्त गरेका हुन् । अमेरिकी अधिकारीसँग वार्ता गरेपछि मध्यस्थता गरिरहेका कतारी अधिकारीका अनुसार जुन महिनामा रोकिएको युद्धविरामको प्रक्रियालाई फेरि ब्युँताउन लागिएको हो । अमेरिकी सञ्चार माध्यमले जनाए अनुसार यसअघि नै अमेरिकी उपराष्ट्रपति जेडी भान्सले इरानका मसद रजाइलाई पठाएको पत्रमा शान्ति वार्ता फेरि सुरू गर्न प्रस्ताव गरिएको छ । इरानले पनि अमेरिकाको पत्र आएको र युद्ध अन्त्यका लागि कतारी मध्यस्थकर्ताहरूसँग कुरा गरेको स्वीकार गरेका छन् । नयाँ वार्ताका लागि दोहा या इस्तानबुल एक स्थान छनोट हुने छन् । यसैगरी सो वार्ता सफल नभएमा वासिङ्टनले आफ्ना सहयात्रीलाई नोभेम्बर ३ को उप निर्वाचनपछि आक्रमण गर्नका लागि तयार रहन भनिसकेको छ । वाल स्ट्रेट जर्नलका अनुसार अमेरिकी सिनेटर त्रिलस मर्फी बिहीबार नयाँ आक्रमणकोबारे पनि सल्लाह गरेका थिए । यसैबीच जर्मनीका चान्सलर फ्रेडरिक मर्चले इरानमा भएको युद्धका कारण आफ्नो देशले ऊर्जामा धेरै खर्च गर्नु परेकोले समस्या उत्पन्न भएको बताएका छन् । उनका अनुसार गएको ८ महिनामा ऊर्जामा जर्मनीको १०० बिलियन युरो बढी खर्च भएको छ । शुक्रबार सियोलमा पत्रकारहरूसँग कुराकानी गर्दै उनले युद्ध अन्त्यका लागि जर्मनीले पहल गरिरहेको बताए । उनले सैन्य प्रयासले मात्र यो युद्ध नसकिने धारणा पनि व्यक्त गरेका छन् । जर्मनीमा मात्र होइन संसारभरि नै गत अप्रिलको तुलनामा धेरै नै पेट्रोलियम पदार्थको मूल्य वृद्धि भएको छ । यसैबीच, साउदी अरेबियाका विदेशमन्त्री फैसन बिन फरहान अल साउदले जहाजहरूको बाटोको विषयमा रुसी समकक्षी सर्जी लाभरोभसँग भेट गरेका छन् । अहिले यसै युद्धका कारण संसारका धेरै धनी देशमा पनि ऊर्जा सङ्कट देखिन थालेको छ ।