चाडपर्व लक्षित ‘प्रोएक्टिभ’ सुरक्षा रणनीति प्रभावकारी, ठूला दुर्घटना र अपराधमा कमी

चाडपर्व केन्द्रित सक्रिय प्रहरी परिचालन र आधुनिक प्रविधिको प्रयोगका कारण यस वर्षको बडादशैँ अवधिमा देशभरको शान्ति सुरक्षा सुदृढ रहेको नेपाल प्रहरीले जनाएको छ । सिन्धुलीको सुनकोशी नदीमा भएको यात्रुवाहक सुमो दुर्घटनाबाहेक ठूलो जनधनको क्षति हुने अन्य गम्भीर घटनाको जानकारी प्राप्त नभएको प्रहरीले जनाएको हो । नेपाल प्रहरीका प्रवक्ता प्रहरी नायव महानिरीक्षक (डीआईजी) अविनारायण काफ्लेले दशैँलाई सुरक्षित र मर्यादित बनाउन प्रहरीले ‘प्रोएक्टिभ पोलिसिङ’ अर्थात् सम्भावित जोखिमको पूर्वानुमान गरी सक्रिय रूपमा सुरक्षा व्यवस्था मिलाउने रणनीति अपनाएको बताए । सुनकोशी नदीमा भएको सुमो दुर्घटनामा तीन जनाको मृत्यु, तीन जना बेपत्ता र चार जना घाइते भएको जानकारी दिँदै उनले उक्त घटनाबाहेक ठूलो क्षति हुने अन्य दुर्घटनाको विवरण प्राप्त नभएको बताए । उनका अनुसार चाडपर्व लक्षित सुरक्षा योजनाअन्तर्गत प्रविधिमैत्री प्रहरी परिचालन र निगरानीलाई प्राथमिकता दिइएको छ । प्रवक्ता काफ्लेले भने, ‘हालसम्म सुनकोशीमा एउटा यात्रुवाहक सुमो दुर्घटना हुँदा तीन जनाको मृत्यु, तीन जना बेपत्ता र चार जना घाइते भएको घटनाबाहेक ठूलो क्षति हुने अन्य दुर्घटनाको रिपोर्ट प्राप्त भएको छैन । नेपाल प्रहरीले यस वर्षको दशैँ सुरक्षा योजनाअन्तर्गत प्रविधिमैत्री र सक्रिय प्रहरी परिचालनमा जोड दिएको छ ।’ प्रहरीले चाडपर्वका बेला हुनसक्ने आपराधिक गतिविधि नियन्त्रण गर्न सीसीटीभी, ड्रोन, तालिमप्राप्त कुकुर, सादा पोशाकका प्रहरी टोली र द्रुत कार्य टोली (क्युआरटी) परिचालन गरेको छ । राजमार्ग तथा भीडभाड हुने क्षेत्रमा निगरानी बढाउनुका साथै सम्भावित सडक अवरोध हटाउन नागढुङ्गा, गजुरी, मुग्लिङ र हेटौँडालगायत संवेदनशील स्थानमा आवश्यक उपकरण र प्राविधिक जनशक्तिसहित प्रहरी टोलीलाई २४ सै घण्टा तयारी अवस्थामा राखिएको काफ्लेले जानकारी दिए । यातायात व्यवसायीसँगको समन्वय र निगरानीका कारण सिट क्षमताभन्दा बढी यात्रु चढाउने तथा टिकटमा कालोबजारी गर्ने प्रवृत्तिमा यसपटक कमी आएको प्रहरीको भनाइ छ । त्यस्तै, समुदाय–प्रहरी साझेदारी र जनचेतनामूलक कार्यक्रममार्फत घर खाली गरेर यात्रामा निस्कने नागरिकलाई चोरी तथा लुटपाटबाट जोगाउने प्रयास गरिएको छ । यस्ता अभियानका कारण घरमा चोरी तथा लुटपाटका घटनामा समेत गिरावट आएको प्रहरीले जनाएको छ । चाडपर्वका बेला महिला, बालबालिका, ज्येष्ठ नागरिक तथा लैङ्गिक र यौनिक अल्पसङ्ख्यक समुदायका नागरिकको सुरक्षामा पनि विशेष ध्यान दिइएको काफ्लेले बताए । यात्राका क्रममा हुने ठगी, बढी भाडा असुली तथा अन्य गैरकानुनी गतिविधिबारे जानकारी दिन प्रहरीले सर्वसाधारणलाई आग्रह गरेको छ । प्रहरीले यात्रामा निस्कनुअघि घरको सुरक्षा सुनिश्चित गर्न, बहुमूल्य गरगहना तथा नगद सुरक्षित स्थान वा बैंक लकरमा राख्न र आफू घरबाहिर रहेको जानकारी सामाजिक सञ्जालमा सार्वजनिक नगर्न अनुरोध गरेको छ । घर खाली गरेर जाँदा छिमेकी तथा स्थानीय प्रहरीलाई जानकारी दिनसमेत आग्रह गरिएको छ । त्यस्तै, मादक पदार्थ वा लागुऔषध सेवन गरेर सवारी नचलाउन, दुईपाङ्ग्रे सवारी चलाउँदा हेल्मेटको फित्ता अनिवार्य रूपमा बाँध्न तथा ट्राफिक नियम पूर्ण रूपमा पालना गर्न प्रहरीले सचेत गराएको छ । जुवा–तास, अवैध ओसारपसार, भन्सार छलीलगायत गैरकानुनी गतिविधिमा संलग्न नहुन र त्यस्ता गतिविधिबारे जानकारी भए प्रहरीको आपत्कालीन नम्बर १०० मा खबर गर्न पनि अनुरोध गरिएको छ । दशैँ, तिहार, छठलगायत चाडपर्वलाई सुरक्षित, मर्यादित र सौहार्दपूर्ण बनाउन प्रहरीको सुरक्षा व्यवस्था थप सुदृढ पारिएको उल्लेख गर्दै काफ्लेले शान्ति सुरक्षा कायम गर्न आम नागरिकलाई प्रहरीसँग सहकार्य गर्न आग्रह गरे ।