‘ककरोच’को प्रदर्शनअघि दिल्लीको सेन्ट्रल पार्क दुई दिन बन्द, निषेधाज्ञा जारी

काठमाडौं । भारतको राजधानी नयाँ दिल्लीमा ककरोच जनता पार्टी (सीजेपी)ले प्रदर्शन गर्ने घोषणा गरेपछि कनट प्लेसस्थित सेन्ट्रल पार्क यही अक्टोबर १६ र १७ का निम्ति बन्द गरिएको छ । दिल्ली प्रहरीले भारतीय नागरिक सुरक्षा संहिताको धारा १६३ अन्तर्गत निषेधाज्ञा समेत जारी गरेको छ । सीजेपीले शुक्रबार बेलुका ५ बजे राष्ट्रिय झन्डा बोकेर पार्कमा भेला हुन आह्वान गरेको छ । आम आदमी पार्टीले पनि आफ्ना कार्यकर्ता र समर्थकलाई प्रदर्शनमा सहभागी हुन अपिल गरेको छ । सुरक्षा अवस्थालाई ध्यानमा राख्दै पार्क र आसपासका क्षेत्रमा निषेधाज्ञा जारी गरिएको दिल्ली प्रहरीकी जनसम्पर्क अधिकारी नेहा यादवले बताइन् । प्रहरीले प्रदर्शनमा सहभागी नहुन सर्वसाधारणलाई आग्रह गर्दै कानुनी कारबाही हुन सक्ने चेतावनी दिएको छ । प्रदर्शन रोक्ने प्रहरीको प्रतिबद्धता सीजेपीको प्रदर्शन रोक्न माग गर्दै अनिलकुमार गुप्ताले दिल्ली उच्च अदालतमा जनहित याचिका दायर गरेका थिए । बिहीबार अदालतमा प्रहरीले प्रदर्शन नियन्त्रण गर्न आवश्यक कदम चाल्ने प्रतिबद्धता जनाएको बार एन्ड बेन्चले उल्लेख गरेको छ । अदालतले सीजेपीका संस्थापक अभिजीत दीपके, पार्टीका पदाधिकारी र अरू सम्बन्धित व्यक्तिहरूका गतिविधि नियन्त्रण गर्न आवश्यक कदम चालिने जनाएको छ । पत्रकार सम्मेलनमा मोदी सरकारको आलोचना प्रदर्शनको अघिल्लो दिन बिहीबार सीजेपीले दिल्ली प्रेस क्लबमा पत्रकार सम्मेलन गरेको थियो । कार्यक्रममा संस्थापक दीपके, अखिल भारतीय विद्यार्थी संघकी राष्ट्रिय अध्यक्ष नेहा बोरा, अभिनेता प्रकाश राज, वरिष्ठ अधिवक्ता प्रशान्त भूषणलगायत सहभागी थिए । पत्रकार सम्मेलनमा दीपकेले प्रधानमन्त्री नरेन्द्र मोदी नेतृत्वको सरकारको आलोचना गर्दै त्यसलाई तानाशाही प्रवृत्तिको संज्ञा दिए । उनले नागरिकमाथि प्रहरी दमन र गिरफ्तारी भइरहेको आरोप लगाउँदै राष्ट्रिय झन्डा फहराउनु अपराध नभएको बताए । दुई दिनअघि सीजेपीका सहसंयोजक आशुतोष रांका र सौरभ दासलाई जन्तरमन्तरमा राष्ट्रिय झन्डा बोकेर पुगेको आरोपमा पक्राउ गरी पाँच दिनको न्यायिक हिरासतमा पठाइएको थियो । दीपकेले नागरिकमाथि भएको भनिएको अन्याय र पार्टीका नेताहरूको गिरफ्तारीविरुद्ध शुक्रबार बेलुका ५ बजे सेन्ट्रल पार्कमा भेला हुन आह्वान गरे । सीजेपीले यसअघि मुख्य निर्वाचन आयुक्त ज्ञानेश कुमारको राजीनामा माग गर्दै ४८ घण्टे ‘अल्टिमेटम’ दिएको थियो । आफू निगरानीमा रहेको दीपकेको दाबी दीपकेले आफू बसेको स्थान वरपर सादा पोसाकका प्रहरी परिचालन गरिएको र सेतो स्कोर्पियो गाडीले पछ्याइरहेको आरोप लगाएका छन् । बिहीबार राति सामाजिक सञ्जाल एक्समा पोस्ट गर्दै उनले शुक्रबार ‘लहरा दो तिरंगा’ र्‍याली निकाल्ने घोषणा पनि गरेका छन् । सेन्ट्रल पार्क दुई दिन बन्द गर्ने निर्णयप्रति उनले कटाक्ष गरेका छन् । प्रदर्शनका निम्ति १०० ठाउँ घोषणा गरिए सबै स्थान बन्द गर्ने हो ? भन्दै उनले प्रश्न गरेका छन् ।