इरानको तेल र देश नै कब्जा गर्न सक्छु: ट्रम्प

काठमाडौं।अमेरिकी राष्ट्रपति डोनाल्ड ट्रम्पले इरानविरुद्ध पुनः सैन्य कारबाहीको सङ्केत गर्दै आवश्यक परे इरानको सम्पूर्ण तेल कब्जा गर्न वा पूरै देशलाई नियन्त्रणमा लिन सक्ने दाबी गरेका छन्। शुक्रबार ह्वाइट हाउसबाट फ्लोरिडामा आयोजित र्यालीमा जानुअघि पत्रकारहरूसँग कुरा गर्दै ट्रम्पले इरान अहिले कमजोर अवस्थामा रहेको बताएका हुन्। ट्रम्पले भने, इरानले अहिले खासै केही गर्न सक्ने अवस्थामा छैन। हामीले चाह्यौँ भने त्यहाँको सबै तेल कब्जा गर्न सक्छौँ। हामी पूरै देश नै कब्जा गर्न सक्छौँ। इरानसँगको द्वन्द्व अझै एक वर्षसम्म लम्बिन सक्ने संयुक्त राष्ट्रसङ्घका लागि अमेरिकी राजदूत माइक वाल्ट्जको भनाइबारे सोधिएको प्रश्नमा ट्रम्पले द्वन्द्व छिट्टै अन्त्य गर्न सकिने बताए। उनले भने, हामी यसलाई निकै छिटो अन्त्य गर्न सक्छौँ। प्रश्न यो हो-के हामी यसलाई पूर्ण रूपमा टुङ्ग्याउन चाहन्छौँ वा आफैँ कमजोर हुँदै जान दिने हो? फ्लोरिडाको र्यालीलाई सम्बोधन गर्दै ट्रम्पले इरानविरुद्ध अर्को सैन्य कारबाहीको सङ्केत गर्दै भने, हामी अर्को एउटा सानो ‘एपिक फ्युरी’ सञ्चालन गर्न सक्छौँ। ‘एपिक फ्युरी’ फेब्रुअरी २८ मा अमेरिकाले इजरायलसँग मिलेर इरानविरुद्ध गरेको सैन्य कारबाहीसँग सम्बन्धित छ। अमेरिका र इजरायलले अमेरिकी मध्यावधि निर्वाचनपछि इरानमाथि पुनः आक्रमण गर्ने योजनाबारे छलफल गरिरहेको समाचार सार्वजनिक भइरहेका बेला ट्रम्पको यो अभिव्यक्ति आएको हो। यद्यपि, इरानविरुद्ध अर्को सैन्य कारबाही गर्ने विषयमा ट्रम्पले अन्तिम स्वीकृति दिने वा नदिने भन्ने अझै अनिश्चित रहेको अमेरिकी सञ्चारमाध्यमहरूले जनाएका छन्।