अडियो प्रकरणमा खगेन्द्र सुनारको इन्कारी जवाफ, अब छानबिन प्राविधिक परीक्षणतर्फ

काठमाडौं । विवादित अडियो प्रकरणमा राष्ट्रिय स्वतन्त्र पार्टी (रास्वपा) का सांसद खगेन्द्र सुनारले आफ्नो संलग्नता अस्वीकार गरेपछि पार्टीको छानबिन प्राविधिक परीक्षणतर्फ अघि बढेको छ। सुनारले पार्टीको अनुशासन आयोगअन्तर्गतको छानबिन समितिलाई लिखित रूपमा जवाफ दिँदै सार्वजनिक भएको अडियोमा सुनिएको आवाज आफ्नो नभएको दाबी गरेका छन्। अनुशासन समितिका उपप्रमुख तथा छानबिन समिति संयोजक अधिवक्ता हरिचन्द्र भट्टराईका अनुसार सुनारले अडियो संवाद आफ्नो नभएको भन्दै लिखित इन्कारी पत्र दिएका छन्। उनका अनुसार सुनारले सामाजिक सञ्जालमार्फत यसअघि सार्वजनिक गरेका दाबीहरूकै आधारमा लिखित जवाफ दिएका हुन्। सुनारले अडियो आफ्नो नभएको दाबी गरेपछि छानबिन समितिले अब प्रमाण संकलनमा जोड दिएको छ। समितिले अडियो सार्वजनिक गर्ने जनआस्था पत्रिकासँग सम्पादन हुनुअघिको मूल अडियो प्राप्त गरेको छ। साथै, पीडित भनिएकी महिलाको नाममा प्रसारित अन्तर्वार्ताको अडियो उपलब्ध गराउन न्युज २४ लाई पत्राचार गरिएको समितिले जनाएको छ। समितिका संयोजक भट्टराईका अनुसार संकलित अडियोको आन्तरिक रूपमा प्रमाणीकरण गरिनेछ। आवश्यक परे प्राविधिक परीक्षणका लागि सम्बन्धित निकायमा पठाउने तयारी समितिको छ। उनका अनुसार प्राविधिक परीक्षण पूरा भएपछि सुनारसँग थप सोधपुछ गरिनेछ। प्राविधिक परीक्षणमा लाग्ने समयअनुसार छानबिनको अन्तिम प्रक्रिया अघि बढ्नेछ। अन्य पक्षको अनुसन्धान भने धेरै अघि बढिसकेको समितिले जनाएको छ। विवादित अडियो सार्वजनिक भएपछि सुनारले त्यसलाई एआईलगायत प्रविधिको प्रयोग गरेर बनाइएको भन्दै आफ्नो बचाउ गर्दै आएका छन्। प्रहरीमा भएको भ्रष्टाचारसम्बन्धी विषय उठाएपछि आफूलाई निरन्तर निशाना बनाइएको उनको दाबी छ। सामाजिक सञ्जालमार्फत उनले सार्वजनिक भएका आरोपहरू झुटा र एआईलगायत प्रविधिबाट तयार गरिएका प्रचार भएको दाबी गरेका थिए। अडियो सार्वजनिक भएपछि रास्वपाले पनि घटनालाई गम्भीर रूपमा लिँदै सांसद सुनारमाथि आन्तरिक छानबिन गर्न अनुशासन आयोगलाई निर्देशन दिएको थियो। छानबिन निष्कर्षमा नपुग्दासम्म सुनारलाई सार्वजनिक पदको हैसियतमा औपचारिक कार्यक्रममा सहभागी नहुनसमेत निर्देशन दिइएको छ।