एनपिएलमा पाकिस्तानी खेलाडीको सहभागिता अनिश्चित

काठमाडौं । नेपाल प्रिमियर लिग (एनपिएल) मा सहभागी हुने पाकिस्तानी खेलाडीको सहभागिता अनिश्चित बनेको छ । प्रतियोगितामा खेल्न आवश्यक अनापत्ति प्रमाणपत्र (एनओसी) जारी गर्ने प्रक्रिया पाकिस्तान क्रिकेट बोर्ड (पिसिबी) ले रोकेको र यसअघि अनुमति पाइसकेका खेलाडीको स्वीकृतिसमेत स्थगित गरेको रिपोर्ट सार्वजनिक भएपछि उनीहरूको सहभागितामाथि अन्योल बढेको हो । क्रिकइन्फोले एनपिएलसँग सम्बन्धित विभिन्न व्यक्तिसँग कुरा गर्दा यसअघि एनओसी पाइसकेका खेलाडीलाई समेत लिगमा सहभागी हुने अनुमति तत्कालका लागि रोकिएको जानकारी दिइएको छ । लिगसँग सम्बन्धित व्यक्तिहरूका अनुसार पिसिबीले पाकिस्तानी खेलाडीलाई एनओसी दिन शुल्क मागेको छ । उक्त शुल्क प्रतिखेलाडी करिब २५ हजार अमेरिकी डलर रहेको बताइएको छ । पाकिस्तानी सञ्चारमाध्यम जियो सुपरले पनि उक्त समाचार उद्धृत गर्दै खेलाडीको सहभागिता अन्योलमा परेको जनाएको छ । यद्यपि, क्रिकइन्फोले उक्त रकम माग गरिएको विषयमा बोर्डको औपचारिक लिखित माग स्वतन्त्ररूपमा पुष्टि गर्न नसकेको जनाएको छ । यस विषयमा पाकिस्तान क्रिकेट बोर्डको आधिकारिक प्रतिक्रिया सार्वजनिक भइसकेको छैन । एनपिएल सोमबारदेखि सुरु भएको छ । नोभेम्बर २१ सम्म सञ्चालन हुने प्रतियोगितामा आठ टोली सहभागी छन् । प्रतियोगिता सुरु भइसक्दा एनओसीसम्बन्धी विवाद देखिएपछि पाकिस्तानी खेलाडीलाई अनुबन्ध गरेका टोलीको तयारी प्रभावित हुन सक्ने देखिएको छ । रिपोर्टअनुसार केही पाकिस्तानी खेलाडी काठमाडौं आइसकेका छन् भने नेपाल आउन तयारीमा रहेका अन्य खेलाडीले समस्या समाधान नहुँदासम्म यात्रा स्थगित गरेका छन् । एनपिएलमा सहभागी हुने पाकिस्तानी खेलाडीमा टी-२० अन्तर्राष्ट्रिय टोलीका कप्तान साहिबजादा फरहान, हैदर अली, हुसेन तलात, इफ्तिखार अहमद, शाकिब अल हसन र उसामा मिरलगायत छन् । उनीहरूमध्ये कोही पनि एनपिएल अवधिमा पाकिस्तानको टेष्ट वा एकदिवसीय अन्तर्राष्ट्रिय टोलीको योजनामा नरहेको रिपोर्टमा उल्लेख छ । त्यसैले अन्तर्राष्ट्रिय खेलतालिकासँग जुध्ने विषयभन्दा पनि एनओसी जारी गर्ने प्रक्रिया नै अहिले मुख्य अवरोध बनेको देखिन्छ । पिसिबीले यसै वर्ष आफ्नो केन्द्रीय अनुबन्ध प्रणालीमा परिवर्तन गर्दै रातो बल र सेतो बल क्रिकेटका लागि छुट्टाछुट्टै संरचना बनाएको थियो । नयाँ व्यवस्थामा ‘ट्र्याक डी’ अन्तर्गत टी-२० विशेषज्ञ खेलाडीलाई वर्गीकरण गर्ने प्रावधानसमेत राखिएको छ । अन्तर्राष्ट्रिय खेलसँग तालिका नजुधेको अवस्थामा खेलाडीलाई विदेशी टी-२० लिगमा सहभागी हुन थप लचकता दिने उद्देश्यले यस्तो व्यवस्था गरिएको बताइएको थियो । तर, नयाँ अनुबन्ध प्रणालीअन्तर्गत कुन खेलाडी कुन श्रेणीमा छन् र उक्त व्यवस्था पूर्णरूपमा कार्यान्वयनमा आइसकेको छ वा छैन भन्नेबारे पिसिबीले सार्वजनिक रूपमा स्पष्ट पारेको छैन । एनओसी प्रक्रिया कहिले टुंगिने र पाकिस्तानी खेलाडीले एनपिएल खेल्न पाउने वा नपाउने भन्ने विषयमा अझै अन्तिम निर्णय भइसकेको छैन । प्रतियोगिता सुरु भइसक्दा देखिएको यो अन्योलले सम्बन्धित खेलाडीमात्र नभई उनीहरूलाई अनुबन्ध गरेका टोलीको योजनामाथि समेत प्रश्न खडा गरेको छ ।