नेपाल क्लियरिङ्ग हाउसको १५औं वार्षिक साधारण सभा सम्पन्न, लाभांश प्रस्ताव पारित

नेपाल क्लियरिङ हाउस लिमिटेड (एनसीएचएल) ले सेयरधनीलाई १५ प्रतिशत बोनस सेयर र कर प्रयोजनका लागि ०.७८९४७४ प्रतिशत नगद लाभांश वितरण गर्ने भएको छ। कम्पनीको बुधबार काठमाडौंमा सम्पन्न १५औँ वार्षिक साधारण सभाले आर्थिक वर्ष २०८२/८३ को वित्तीय विवरण पारित गर्दै उक्त लाभांश वितरण गर्ने निर्णय गरेको हो। सभाले २०८३ असार मसान्तसम्मको वासलात, नाफा–नोक्सान हिसाब तथा नगद प्रवाह विवरणसमेत स्वीकृत गरेको छ। बोनस सेयर वितरणपछि कम्पनीको चुक्ता पुँजी एक अर्ब ६७ करोड ७२ लाख ८८ हजार २०० रुपैयाँ पुग्नेछ। कम्पनीले बढेको पुँजी राष्ट्रिय भुक्तानी प्रणाली, राष्ट्रिय तथा सीमापार भुक्तानी कारोबारका लागि थप प्रणाली, डिजिटल सार्वजनिक पूर्वाधार (डीपीआई), जोखिम व्यवस्थापन तथा सञ्चालनमा रहेका पूर्वाधारको स्तरोन्नतिमा उपयोग गर्ने जनाएको छ। आर्थिक वर्ष २०८२/८३ मा एनसीएचएलका भुक्तानी प्रणालीमार्फत कुल २१० खर्ब रुपैयाँ बराबरका २३ करोड ८२ लाख कारोबार राफसाफ भएका छन्। अघिल्लो आर्थिक वर्षको तुलनामा कारोबारको संख्या र रकममा १३ प्रतिशत वृद्धि भएको कम्पनीले जनाएको छ। यस अवधिमा कम्पनीको सञ्चालन आम्दानी ७ प्रतिशतले बढेको छ। यद्यपि, कम्पनीको खुद नाफा भने अघिल्लो आर्थिक वर्षको तुलनामा २ प्रतिशतले घटेर ४१ करोड रुपैयाँ कायम भएको छ। सभाले बैंकिङ, वित्तीय तथा भुक्तानीसम्बन्धी प्रविधिमा अनुसन्धान, प्रविधि तथा सफ्टवेयरको विकास र जडानलगायत काम गर्ने उद्देश्यसहित छुट्टै सार्वजनिक लिमिटेड कम्पनी स्थापना गर्ने प्रक्रिया अघि बढाउन सञ्चालक समितिलाई अख्तियारी दिएको छ। प्रस्तावित कम्पनीले वित्तीय क्षेत्रका लागि आवश्यक प्रविधि तथा सफ्टवेयर विकास र जडानमा काम गर्नेछ। एनसीएचएलको सञ्चालक समितिमा नेपाल राष्ट्र बैंकबाट एक जना, वाणिज्य बैंकबाट तीन जना, विकास बैंक र वित्त कम्पनीबाट एक–एक जना तथा एक जना स्वतन्त्र सञ्चालकको प्रतिनिधित्व छ। कम्पनीमा नेपाल राष्ट्र बैंकको ९.४५ प्रतिशत र बैंक तथा वित्तीय संस्थाहरूको ९०.५५ प्रतिशत स्वामित्व रहेको छ।