‘१२ गाउँ २’ को अग्रिम टिकट बुकिङ खुल्यो

काठमाडौं । अभिनेता विराज भट्टको निर्देशनमा बनेको बहुप्रतीक्षित फिल्म ‘१२ गाउँ २’ को अग्रिम टिकट बुकिङ खुला भएको छ । प्रदर्शन मिति नजिकिँदै गर्दा राजधानी काठमाडौंसहित मोफसलका अधिकांश मल्टिप्लेक्सले फिल्मको टिकट बुकिङ खुलाएका हुन् । एक्सन, पारिवारिक सम्बन्ध, संघर्ष र प्रतिशोधको कथा समेटिएको फिल्मले सुरुवाती चरणमा देशभर १ सय ४ शो पाएको छ । फिल्मप्रति दर्शकको चासो बढिरहेका बेला मल्टिप्लेक्समा पाएको शो संख्यालाई पनि अर्थपूर्ण रूपमा हेरिएको छ । विशेषगरी अभिनेता विराज भट्ट र समीर भट्टको जोडी पर्दामा कस्तो देखिनेछ भन्ने कौतुहलता दर्शकमाझ छ । देशकै ठूलो मल्टिप्लेक्स चेन क्यूएफएक्सले शुक्रबारका लागि काठमाडौं उपत्यकामा २३ शो उपलब्ध गराएको छ भने मोफसलमा २२ शो दिएको छ । त्यस्तै, दोस्रो ठूलो मल्टिप्लेक्स चेन आईएनआईले देशभरका आफ्ना आउटलेटमा १६ शो दिएको छ । फ्रेन्ड्स सिनेमाज्ले १०, वान सिनेमाज्ले ८ र बिग मुभिजले ३ शो उपलब्ध गराएका छन् । अन्य मल्टिप्लेक्सले भने अहिलेसम्म फिल्मको शो सार्वजनिक गरिसकेका छैनन् । आगामी दिनमा थप शो उपलब्ध हुने सम्भावना रहेकाले फिल्मको प्रदर्शन तालिका अझै बढ्न सक्नेछ । फिल्मका वितरक गोविन्द शाहीका अनुसार हलहरूले शो उपलब्ध गराउने क्रम जारी छ । उनले आज साझसम्ममा देशभरका हलहरूबाट ‘१२ गाउँ २’ले १५० भन्दा बढी शो पाउने दाबी गरेका छन् । ‘१२ गाउँ २’ ले चलचित्र जाँच समिति (सेन्सर बोर्ड) बाट ‘पीजी’ प्रमाणपत्र प्राप्त गरेको छ । यससँगै १६ वर्षभन्दा कम उमेरका दर्शकले फिल्म हेर्न जाँदा अभिभावकको साथ लिनुपर्नेछ । एक्सनप्रधान दृश्यसँगै पारिवारिक सम्बन्ध, संघर्ष र प्रतिशोधलाई जोडेर निर्माण गरिएको फिल्ममा विराज भट्ट र समीर भट्ट मुख्य आकर्षणका रूपमा रहेका छन् । बुबा–छोराको पर्दा उपस्थितिसमेत दर्शकका लागि चासोको विषय बनेको छ । फिल्ममा विराज भट्ट, समीर भट्ट, अनुपविक्रम शाही, प्रकाश शाह, सुनील पोखरेल, कालु राना, कृशु शाही (काफिया), वर्षा इटनी, खुसी कार्की र पुष्कर भट्टलगायत कलाकारको अभिनय रहेको छ । फिल्मको निर्देशन विराज भट्टले गरेका हुन् भने कथा तथा पटकथा सन्तोष सरकारको छ । महेश पौडेलले छायाङ्कन गरेको फिल्मलाई बन्दे प्रसादले सम्पादन गरेका छन् । युग भुसाल र डीपी खनालको संगीत रहेको फिल्ममा रामजी लामिछाने र सियोन श्रेष्ठले नृत्य निर्देशन गरेका छन् । त्यस्तै, स्टन्ट सिल्भा र शंकर महर्जनले द्वन्द्व निर्देशन गरेका छन् । एक्सन दृश्य, पारिवारिक सम्बन्ध र प्रतिशोधको कथालाई कसरी प्रस्तुत गरिएको छ भन्ने विषयले ‘१२ गाउँ २’ प्रति दर्शकको चासो बढाएको छ ।