भारत सरकारको सहयोगमा तेह्रथुममा शीतभण्डार निर्माण सुरु

भारत सरकारको सहयोगमा तेह्रथुममा शीतभण्डार निर्माण सुरु भएको छ। लालीगुराँस नगरपालिका–२ मा निर्माण हुने शीतभण्डारको बुधबार शिलान्यास गरिएको छ । शीतभण्डारको नेपालस्थित भारतीय दूतावासका प्रथम सचिव ऋषभ देव र लालीगुराँस नगरपालिकाका प्रमुख अर्जुन माबोहाङले संयुक्त रूपमा शिलान्यास गरेका हुन्। शीतभण्डार निर्माणका लागि भारत सरकारले करिब ४ करोड ४१ लाख रुपैयाँ आर्थिक सहयोग उपलब्ध गराएको छ। भारत सरकारको उच्च प्रभाव सामुदायिक विकास परियोजना (एचआईसीडीपी) अन्तर्गत निर्माण हुने यो आयोजना लालीगुराँस नगरपालिकामार्फत कार्यान्वयन गरिनेछ। यो तेह्रथुम जिल्लामा सञ्चालन हुन लागेको दोस्रो एचआईसीडीपी परियोजना हो। शीतभण्डार निर्माणले लालीगुराँस नगरपालिकामा कृषि उपजको भण्डारण तथा व्यवस्थापन सहज बनाउनुका साथै दिगो कृषि व्यवसाय विकासमा सहयोग पुग्ने अपेक्षा गरिएको छ। शिलान्यास कार्यक्रममा नगरप्रमुखसहित स्थानीय सरोकारवालाले भारत सरकारको विकास सहयोगको प्रशंसा गर्दै नयाँ पूर्वाधारले कृषि क्षेत्रको दीर्घकालीन विकासमा योगदान पुर्‍याउने विश्वास व्यक्त गरेका थिए। नेपाल र भारतबीच विभिन्न क्षेत्रमा हुँदै आएको सहकार्यअन्तर्गत एचआईसीडीपी परियोजनाले नेपालको प्राथमिकताका क्षेत्रमा पूर्वाधार विकास र आर्थिक वृद्धिका लागि सहयोग गर्दै आएको भारतीय दूतावासले जनाएको छ।