ओमानमा नेपाली श्रमिकको सुरक्षा र आर्थिक कूटनीतिमा जोड दिने पदमाक्षी राणाको प्रतिबद्धता

ओमानका लागि प्रस्तावित नेपाली राजदूत पदमाक्षी राणाले नेपाली श्रमिकको सुरक्षा, समस्या समाधान र आर्थिक सम्बन्ध विस्तारलाई प्राथमिकतामा राखेर काम गर्ने प्रतिबद्धता व्यक्त गरेकी छन् । मंगलबार सिंहदरबारमा बसेको संसदीय सुनुवाइ समितिको बैठकमा आफ्नो कार्ययोजना प्रस्तुत गर्दै राणाले ओमानमा रहेका नेपाली श्रमिकको अवस्था सुधार गर्न समानुभूतिमा आधारित कूटनीति अवलम्बन गर्ने बताएकी हुन् । उनले ओमानमा नेपाली श्रमिकका लागि सञ्चालनमा रहेको २४ सै घण्टाको हटलाइन सेवालाई निरन्तरता दिने र समस्यामा परेका श्रमिकको उद्धार तथा संरक्षणका लागि सक्रिय भूमिका निर्वाह गर्ने बताइन् । विशेषगरी महिला घरेलु कामदारको सुरक्षा र राहदानी जफत हुनेजस्ता समस्यालाई गम्भीरतापूर्वक सम्बोधन गर्ने उनको भनाइ छ । यस्ता समस्या समाधान गर्न ओमानका सम्बन्धित निकाय र नेपाल सरकारबीच समन्वय बढाएर ठोस पहल गर्ने उनले बताएकी छन् । राणाले श्रम कूटनीतिसँगै उद्यमशीलता, लगानी प्रवर्द्धन र नेपाली उत्पादनको बजार विस्तारलाई पनि प्राथमिकतामा राखेकी छन् । नेपालको रैथाने उत्पादन तथा प्रविधिलाई ओमानको बजारसम्म पुर्‍याउन मूल्य सिर्जनामा आधारित कूटनीति आवश्यक रहेको उनको भनाइ छ । ओमानको विकास रणनीति ‘भिजन २०४०’ सँग तालमेल गर्दै दुई देशबीचको आर्थिक सम्बन्ध थप सुदृढ बनाउने योजना पनि उनले प्रस्तुत गरेकी छन् । नीति निर्माणको तहमा आफू नयाँ भए पनि अनुसन्धान र स्थलगत अनुभवका आधारमा नीतिगत सुधारमा योगदान दिन सक्ने राणाको दाबी छ । आफ्नो सयदिने कार्ययोजनामा उनले हवाई सम्पर्क विस्तार, श्रम सम्झौताको पुनरावलोकन तथा प्लास्टिक फोहोर व्यवस्थापनजस्ता क्षेत्रमा सहकार्य अघि बढाउने लक्ष्यसमेत राखेकी छन् ।