रियाल मड्रिडको पुनरागमन जितमा एमबाप्पेको कीर्तिमान

काठमाडौं । स्पेनिस क्लब रियाल मड्रिडले यूईएफए च्याम्पियन्स लिगमा इटालीको रोमाविरुद्ध ४–३ को रोमाञ्चक पुनरागमन जित निकालेको छ । बुधबार ओलिम्पिको रंगशालामा पाहुना टोली रियाललाई जित दिलाउन किलियन एमबाप्पे, कार्लोस एस्पी, एन्ड्रिक र एन्टोनियो रुडिगरले गोल गरे । रोमाका डोन्येल मालेनले दुई तथा मार्टेन डे रुनले एक गोल गरे । खेलको २०औँ मिनेटमा रुनको गोलमार्फत रोमाले अग्रता लिएको थियो । तर, टोलीले त्यसलाई लामो समयसम्म टिकाउन सकेन । गोल व्यहोरेको पाँच मिनेटपछि नै एमबाप्पेले रियाललाई बराबरीमा ल्याए । मालेनले ५१ र ५८औँ मिनेटमा गोल गर्दा रोमा ३–१ ले अगाडि बढ्यो । दुई गोलले पछि परेको अवस्थामा खेलको अन्त्यतिर सानदार प्रदर्शन गर्दै रियालले जित निकाल्यो । एस्पीले ८३ र एन्ड्रिकले ८५औँ मिनेटमा गोल गर्दै रियाललाई ३–३ को बराबरीमा ल्याए । निर्धारित समयको अन्तिम मिनेटमा रुडिगरले गरेको गोल रियालको जितमा निर्णायक बन्यो । यो एमबाप्पेको १००औँ च्याम्पियन्स लिग खेल थियो । यससँगै २७ वर्षिय एमबाप्पे च्याम्पियन्स लिगमा १०० खेल खेल्ने सबैभन्दा कान्छा खेलाडी बनेका छन् । यसअघि अर्जेन्टाइन स्टार लियोनल मेसीले सन् २०१५ मा २८ वर्षको उमेरमा १०० च्याम्पियन्स लिग खेल खेल्ने कीर्तिमान बनाएका थिए । लगातार दोस्रो जितसँगै दुई खेलबाट ६ अंक जोडेको रियाल आठौँ स्थानमा छ । पराजित रोमा एक अंकका साथ २५औँ स्थानमा छ ।