काठमाडौं । नेपालले सन् २०२७ जुन ३ मा इंग्ल्यान्डको विश्वप्रसिद्ध लर्ड्स क्रिकेट मैदानमा बंगलादेशसँग टी–२० अन्तर्राष्ट्रिय क्रिकेट खेल्ने भएको छ । मेरिलेबोन क्रिकेट क्लब (एमसीसी) ले बिहीबार सार्वजनिक गरेको खेल तालिकाअनुसार नेपालले इंग्ल्यान्ड भ्रमणका क्रममा बंगलादेशसँग लर्ड्समा प्रतिस्पर्धा गर्नेछ । उक्त खेल सोही दिन लर्ड्समा आयोजना हुने मिडलसेक्सको टी–२० ब्लास्ट खेलसँगै सञ्चालन हुनेछ । लर्ड्समा पुरुष अन्तर्राष्ट्रिय र घरेलु क्रिकेट प्रतियोगिताका खेल एकै दिन आयोजना हुन लागेको यो पहिलो अवसर हुनेछ । बंगलादेशले लर्ड्समा पहिलो पटक पुरुष टी–२० अन्तर्राष्ट्रिय खेल खेल्न लागेको हो । यसअघि सन् २०२६ मा बंगलादेशको महिला टोलीले लर्ड्समा खेलिसकेको छ । नेपालले भने उक्त मैदानमा दोस्रो पटक टी–२० अन्तर्राष्ट्रिय खेल खेल्न लागेको हो । यसअघि नेपालले सन् २०१८ मा नेदरल्यान्ड्ससँग लर्ड्समा प्रतिस्पर्धा गरेको थियो । एमसीसीको आयोजनामा हुने इंग्ल्यान्ड भ्रमणका क्रममा नेपालले आयरल्यान्ड र स्कटल्यान्डसँग पनि विभिन्न खेल खेल्नेछ । ती खेललाई अन्तर्राष्ट्रिय क्रिकेट परिषद् (आईसीसी) ले मान्यता दिएको छ । खेल तालिकाअनुसार नेपालले जुन १ मा वर्म्स्लीमा स्कटल्यान्डसँग ५० ओभरको खेल खेल्नेछ । त्यसपछि जुन ३ मा लर्ड्समा बंगलादेशसँग टी–२० अन्तर्राष्ट्रिय खेल हुनेछ । नेपालले जुन ६ मा वर्म्स्लीमै आयरल्यान्डसँग ५० ओभरको खेल खेल्नेछ । त्यसैगरी, जुन ९ मा वर्म्स्लीमा आयरल्यान्डसँग टी–२० खेल्ने नेपालले जुन ११ र १२ मा बेकनहममा पनि आयरल्यान्डसँग लगातार दुई टी–२० खेल खेल्ने तालिका छ । एमसीसीका अनुसार लर्ड्समा नेपाल र बंगलादेशबीच हुने खेल नेपाली तथा बंगलादेशी दर्शकलाई लक्षित गर्दै टेलिभिजन प्रसारणको समय अनुकूल हुने गरी तय गरिएको हो । जुन ३ मा हुने टी–२० ब्लास्टको दोस्रो खेल भने प्रतियोगिताको घरेलु खेल तालिका सार्वजनिक भएपछि निर्धारण गरिनेछ ।
लर्ड्समा नेपाल र बंगलादेशबीच ऐतिहासिक टी–२० अन्तर्राष्ट्रिय खेल हुने

Read Complete Original Article
Published originally on हिमालय टाइम्स






