भोलिदेखि सुरु हुने एनपीएलमा कस्तो छ सुरक्षा व्यवस्था ?

काठमाडाैं । त्रिवि अन्तर्राष्ट्रिय क्रिकेट मैदानमा सोमबारबाट सुरु हुने नेपाली क्रिकेटको महाकुम्भ सिद्धार्थ बैंक नेपाल प्रिमियर लिग (एनपीएल)को तेस्रो संस्करणको सम्पूर्ण तयारी पूरा भएको छ । ८ फ्रेन्चाइज टोली मैदान उत्रिने यस प्रतियोगिता मंसिर ५ गतेसम्म चल्नेछ । प्रतियोगिताको उद्घाटन खेलमा गएको संस्करणको विजेता लुम्बिनी लायन्स र उपविजेता सुदूरपश्चिम रोयल्सबीच प्रतिस्पर्धा हुनेछ । भोलि बेलुकी ५ बजे शुरु हुने खेलसँगै तेस्रो संस्करणको औपचारिक शुरुवात हुनेछ । पहिलोपटक डीआरएस भित्रिएको र आईसिसीको मान्यता पाएको एनपीएलमा क्रिकेटको रोमाञ्चक भिडन्तसँगै सुरक्षा पनि उत्तिकै कडा हुने भएको छ । एनपीएलकै लागि भनेर जिल्ला प्रहरी परिसर काठमाडौंले सुरक्षा योजना बनाएर काम सुरू गरेको छ । शनिबार काठमाडौंका सीडीओसहितको टोलीले कीर्तिपुरस्थित त्रिवि क्रिकेट स्टेडियमको स्थलगत निरीक्षण गरेको थियो। प्रहरीले खेलाडीको सुरक्षा, उनीहरू बस्ने आठवटा होटलको सुरक्षा, होटलदेखि स्टेडियमसम्मको आवागमन, ट्राफिक व्यवस्थापन र खेल अवधिभर दर्शकको सुरक्षालाई प्राथमिकतामा राखेको छ। खेलको उद्घाटन र समापन समारोहमा भीआईपी तथा भीभीआईपीको आवागमन हुने भएकाले उनीहरूको सुरक्षाका लागि पनि विशेष व्यवस्था मिलाइएको छ। यी सबै सुरक्षाका लागि दैनिक एक हजारभन्दा बढी प्रहरी परिचालन गरिनेछ। यसमा सादा पोशाकका प्रहरीसमेत रहनेछन्। त्यस्तै, सीसीटीभी क्यामेरा, ड्रोन र तालिमप्राप्त कुकुरमार्फत निगरानी गरिने प्रहरीले जनाएको छ। स्टेडियम वरपर जडान गरिएका सीसीटीभी क्यामेराको निगरानी त्यहीँ खटिएका प्रहरीले गर्नेछन् भने अन्य क्षेत्रको निगरानी प्रहरीको सीसीटीभी कन्ट्रोल रुमबाट हुनेछ। प्रतियोगिताका सबै ३२ खेल त्रिवि मैदानमै सञ्चालन हुनेछन् । लिग चरणमा हरेक टोलीले अन्य सात टोलीसँग एक–एक खेल खेल्नेछ । लिग चरणपछि अंकतालिकाका शीर्ष चार टोली प्लेअफमा प्रवेश गर्नेछन् ।