नेपालको आँखा उपचार सेवाबाट एक वर्षमा भित्रियो डेढ अर्बभन्दा बढी विदेशी मुद्रा

काठमाडौं। नेपालको आँखा उपचार सेवा विदेशी नागरिकका लागि आकर्षक गन्तव्य बन्दै गएको छ। नेपाल नेत्रज्योति सङ्घअन्तर्गतका आँखा अस्पताल तथा उपचार केन्द्रहरूले आर्थिक वर्ष २०८२/८३ मा विदेशी बिरामीको उपचारबाट एक अर्ब ५० करोड रुपैयाँभन्दा बढी विदेशी मुद्रा आर्जन गरेका छन्। सङ्घका प्रमुख वित्त अधिकृत सीए देवराज पन्तका अनुसार दक्ष चिकित्सक, आधुनिक प्रविधि, गुणस्तरीय सेवा र तुलनात्मक रूपमा सुलभ उपचार खर्चका कारण विदेशी बिरामी नेपालमा उपचार गर्न आउने क्रम बढेको हो। हाल सङ्घको सञ्जालमा २८ आँखा अस्पताल र २२६ आँखा उपचार केन्द्र आबद्ध छन्। ती संस्थाले नेपाली नागरिकसँगै भारत, बङ्गलादेश, भुटानलगायत देशका नागरिकलाई आँखा उपचार सेवा प्रदान गर्दै आएका छन्। सङ्घका कार्यकारी निर्देशक डा. शैलेशकुमार मिश्रका अनुसार आर्थिक वर्ष २०८२/८३ सम्ममा सङ्घअन्तर्गतका अस्पताल तथा केन्द्रले पाँच करोडभन्दा बढी आँखाका बिरामीलाई सेवा दिएका छन् भने ५६ लाख ५९ हजारभन्दा बढीको आँखाको शल्यक्रिया गरेका छन्। विदेशी बिरामीले उपचारका अतिरिक्त होटल, यातायात, खाना र अन्य सेवामा गर्ने खर्चले पर्यटन तथा स्थानीय व्यवसायमा समेत योगदान पुर्‍याउने सम्भावना छ। सङ्घका महासचिव भरतबहादुर चन्दले आँखा स्वास्थ्य सेवाको अन्तर्राष्ट्रिय पहिचान बढाउन सरकारले स्वास्थ्य पर्यटनसम्बन्धी स्पष्ट नीति बनाउन, पूर्वाधार तथा प्रविधिमा लगानी बढाउन र विदेशी बिरामीका लागि उपचार प्रक्रिया सहज बनाउन आवश्यक रहेको बताएका छन्। नेपालमा सन् १९८१ मा ०.८४ प्रतिशत रहेको अन्धोपनको दर घटेर करिब ०.२८ प्रतिशतमा झरेको छ। सन् २०३० सम्म अन्धोपनको दर ०.२० प्रतिशतमा झार्ने लक्ष्य लिइएको छ। नेपालको आँखा स्वास्थ्य सेवा मानवीय सेवासँगै विदेशी मुद्रा आर्जन र स्वास्थ्य पर्यटन प्रवर्द्धनको सम्भावनायुक्त क्षेत्रका रूपमा अघि बढिरहेको छ।