एम्बाप्पेको विवादमा फ्रान्सेली फुटबल महासंघका अध्यक्षको बचाउ

काठमाडौं । फ्रान्सका कप्तान किलियन एम्बाप्पेले चीनका पूर्वराष्ट्रपति माओ त्सेतुङलाई ‘तानाशाह’ भनेपछि उत्पन्न विवाद अन्त्य गर्नुपर्ने फ्रान्सेली फुटबल महासंघका अध्यक्ष फिलिप डियालोले बताएका छन् । माओबारे गरेको टिप्पणीप्रति एम्बाप्पेले माफी मागिसकेको र कसैलाई अपमान गर्ने आफ्नो उद्देश्य नरहेको स्पष्ट पारिसकेको भन्दै डियालोले अब उनलाई आफ्नो खेलमा ध्यान केन्द्रित गर्न दिनुपर्ने बताएका हुन् । एम्बाप्पेको क्लब रियल मड्रिड र स्पेनिस ला लिगाले पनि उक्त टिप्पणीप्रति माफी मागिसकेका छन् । ला लिगाका अध्यक्ष जाभियर तेबासले विवाद समाधानका लागि विशेष टोली गठन गर्नुका साथै बुधबार स्पेनका लागि चिनियाँ राजदूत याओ जिङसँग भेट गरेका थिए । चीनमा माओबारे व्यंग्यात्मक टिप्पणी गर्नु सामाजिक रूपमा संवेदनशील विषय मानिन्छ । माओ सन् १९४९ देखि १९७६ मा आफ्नो मृत्युसम्म चीनको नेतृत्वमा थिए । चिनियाँ सरकारी सञ्चारमाध्यम ‘चाइना डेली’ले एम्बाप्पेको टिप्पणीले चिनियाँ समर्थकलाई आक्रोशित बनाएको, उनका व्यावसायिक सम्बन्धमा असर पारेको र चर्चित व्यक्तिको प्रभावको सीमाबारे स्पष्ट सन्देश दिएको जनाएको छ । यसैबीच, चीनको सरकारी प्रसारण संस्था मिगुले आइतबार रियल मड्रिड र रेसिङ सान्टान्डरबीचको खेल प्रसारण नगर्ने भएको छ । त्यस्तै, दुग्ध कम्पनी मेङनिउ, साङ्घाई मिल्कग्राउन्ड फुड टेक र पेय पदार्थ कम्पनी इस्ट्रोक बेभरेजसहितका चिनियाँ ब्रान्डले एम्बाप्पेसँगको सहकार्य अन्त्य गरेका छन् । डियालोले भने विवाद चाँडै समाधान हुने आशा व्यक्त गरेका छन् । फ्रान्सेली सञ्चारमाध्यम ओएस्ट–फ्रान्ससँग बिहीबार कुरा गर्दै उनले भने, ‘किलियनले आफ्नो टिप्पणीको सन्दर्भ राम्ररी स्पष्ट पारेका छन् र माफी पनि मागिसकेका छन् । त्यसैले अब यो विवाद धेरै समय लम्बिनु हुँदैन भन्ने मेरो आशा छ ।’उनले थपे, ‘अब यो विषयलाई यहीँ टुंग्याएर उनलाई सिजनका बाँकी खेल उत्कृष्ट अवस्थामा खेल्न दिनुपर्छ ।’ यो विवाद २७ वर्षीय एम्बाप्पेको क्लबस्तरको प्रभावलाई लिएर लामो समयदेखि चलिरहेको व्यंग्यसँग जोडिएको छ । फ्रान्सेली पोडकास्टमा दिएको अन्तर्वार्ताको भिडियोमा एम्बाप्पेले एउटा मिमबारे चर्चा गर्दै त्यसमा आफ्नो अनुहार कुनै व्यक्तिको तस्बिरमा जोडिएको र ती व्यक्ति चिनियाँ तानाशाह भएको आफूलाई लागेको बताएका थिए । उक्त भिडियो अहिले हटाइसकिएको छ । एम्बाप्पेले खेल्ने क्लबका निर्णयमा समेत प्रभाव पार्न सक्ने उनको शक्तिलाई व्यंग्य गर्दै समर्थकहरूले यसअघि पनि उनको अनुहार विभिन्न सैन्य तथा राजनीतिक नेताका तस्बिरमा जोडेर मिम बनाउने गरेका थिए । यही कारण युरोपेली सञ्चारमाध्यममा उनलाई ‘तानाशाह’ उपनामसमेत दिइएको छ। चीनको विदेश मन्त्रालयका प्रवक्ताले भने एम्बाप्पेको माफीलाई सरकारले गम्भीरतापूर्वक लिएको बताएका छन् ।