३ हजारको सामान किन्दा सन्त मायालाई १० लाख, दीपकराज–दीपाश्रीले दिए जानकारी

काठमाडौं । आन्तरिक राजस्व विभागले सञ्चालन गरेको ‘करदाता प्रोत्साहन उपहार कार्यक्रम’ अन्तर्गत असोज महिनाको दोस्रो पाक्षिकको १० लाख रुपैयाँको बम्पर उपहार नुवाकोटकी सन्त माया तामाङले जितेकी छन्। नुवाकोटस्थित एस.एस. फेन्सी हाउसबाट दसैँका लागि ३ हजार रुपैयाँको सामग्री खरिद गरेकी तामाङको कुपन नम्बर ०८१६३२५१५८४९ बम्पर उपहारका लागि छनोट भएको हो। महाअष्टमीका दिन काठमाडौंको विशाल बजारमा आयोजित प्रत्यक्ष कार्यक्रममा चर्चित कलाकारद्वय दीपकराज गिरी र दीपाश्री निरौलाले कम्प्युटर प्रणालीको बटन थिचेर बम्पर उपहारको कुपन नम्बर छनोट गरेका थिए। विजेता घोषणा भएलगत्तै कलाकार गिरी र निरौलाले कार्यक्रमस्थलबाटै सन्त माया तामाङलाई टेलिफोन गरेका थिए। फोनमा १० लाख रुपैयाँको उपहार परेको खबर सुन्दा उनले सुरुमा विश्वास गर्न सकिनन्। उनलाई कसैले जिस्क्याउन ‘प्र्याङ्क’ गरेको जस्तो लागेको थियो। पछि कलाकार गिरी र निरौलाले आफ्नो परिचय दिँदै यो कुनै ठट्टा नभई नेपाल सरकारको आधिकारिक करदाता प्रोत्साहन योजना भएको स्पष्ट पारेका थिए। कुराकानीका क्रममा कलाकारहरूले १० लाख रुपैयाँको उपहार दाबी गर्न खरिद गरेको सामानको बिल अनिवार्य चाहिने भएकाले बिल सुरक्षित राख्न आग्रह गरेका थिए। साथै, कलाकार दीपाश्री निरौलाले तामाङलाई आफ्नो चलचित्र ‘छ माया छपक्कै २’ को टिकटसमेत निःशुल्क उपलब्ध गराउने घोषणा गरिन्। आन्तरिक राजस्व विभागका अनुसार असोज १६ देखि ३१ गतेसम्म वस्तु तथा सेवा खरिद गर्दा बिल लिएका सेवाग्राहीलाई यस गोलाप्रथामा समावेश गरिएको थियो। उक्त अवधिमा बिल इन्ट्री गरेका तथा डिजिटल (क्यूआर) भुक्तानी गरेका गरी कुल ३ करोड ७७ लाख ५५ हजार २ सय ६४ कारोबार प्रणालीमा सहभागी भएका थिए। सोही कार्यक्रममा असोज १६ देखि ३१ गतेसम्मका प्रत्येक दिन एक–एक जनाका दरले कुल १६ जना दैनिक विजेता पनि घोषणा गरिएको छ। उनीहरूले जनही १ लाख ३३ हजार ३ सय ३४ रुपैयाँको उपहार पाउनेछन्, जसमा कर कट्टीपछि एक लाख रुपैयाँ प्राप्त हुनेछ। विभागका अनुसार बम्पर उपहार विजेता तामाङसहित सबै विजेताले दसैं बिदा सकिएपछि कात्तिक १५ गतेभित्र आफूले सामान खरिद गरेको सक्कल बिलसहित नजिकैको आन्तरिक राजस्व कार्यालयमा पुगेर उपहार रकम दाबी गर्नुपर्नेछ।