सुरक्षा जोखिम देखिएपछि हिमालयन बैंकको वेबसाइट र अनलाइन सेवा अस्थायी बन्द

विश्वभर वेबसाइट तथा अनलाइन प्रणाली सञ्चालनमा प्रयोग हुने पीएचपी प्रोग्रामिङ प्रविधिमा गम्भीर सुरक्षा संवेदनशीलताका कारण हिमालयन बैंक लिमिटेडले आफ्नो आधिकारिक वेबसाइट तथा वेबसाइटमार्फत प्रदान गरिने अनलाइन सेवा अस्थायी रूपमा बन्द गरेको छ। विश्वव्यापी रूपमा पीएचपी प्रविधिमा देखिएको सुरक्षा संवेदनशीलताबाट हुन सक्ने सम्भावित जोखिमलाई मध्यनजर गर्दै वेबसाइट र अनलाइन सेवा बन्द गरिएको बैंकले जनाएको छ। ग्राहकको डाटा तथा बैंकिङ प्रणालीको सुरक्षालाई उच्च प्राथमिकतामा राख्दै उक्त निर्णय गरिएको बैंकको भनाइ छ। बैंकले हाल सम्भावित जोखिमको मूल्याङ्कन गरिरहेको जनाएको छ। जोखिमको पहिचान तथा समाधान गरेपछि वेबसाइट र त्यसबाट उपलब्ध हुने अनलाइन सेवा यथाशीघ्र पुनः सञ्चालनमा ल्याइने बैंकले जनाएको छ। वेबसाइट र अनलाइन सेवा अस्थायी रूपमा बन्द भए पनि बैंकका अन्य सेवाहरू भने नियमित रूपमा सञ्चालन भइरहेको बैंकले स्पष्ट पारेको छ। सेवा अवरुद्ध हुँदा ग्राहकलाई पर्न गएको असुविधाप्रति बैंकले क्षमायाचना गरेको छ। ग्राहक सेवाका लागि बैंकले कल सेन्टर नम्बर ०१–५९०००८९ मा सम्पर्क गर्न सकिने जनाएको छ।