सीजेपीको दिल्लीमा घण्टौँ प्रदर्शन, नेहा र अभिजीत हिरासतमा

काठमाडौं । ककरोच जनता पार्टी (सीजेपी)को आह्वानमा शुक्रबार भारतको नयाँदिल्लीस्थित कनट प्लेस क्षेत्रमा ‘लहरा दो तिरंगा’ मार्च निकालिएको छ । निर्वाचन आयोगको मतदाता नामावलीमा गरिएको धाँधली विरुद्ध आन्दोलनको कार्यक्रमअन्तर्गत यो मार्च निकालिएको हो । मार्चअघि नै सीजेपीका संस्थापक अभिजीत दीपके र प्रदर्शनका क्रममा वामपन्थी विद्यार्थी संगठन आइसा (एआईएसए) की राष्ट्रिय अध्यक्ष नेहा बोरालाई प्रहरीले नियन्त्रणमा लिएको थियो । दुवै नेता नियन्त्रणमा लिए पनि कनट प्लेसको इनर सर्कल क्षेत्रमा सयौँ विद्यार्थी, आम आदमी पार्टीका कार्यकर्ता र नागरिक समाजका प्रतिनिधि प्रदर्शनमा सहभागी भएका थिए । प्रहरीले थप प्रदर्शनकारीलाई समेत नियन्त्रणमा लिएको बताइएको छ । प्रदर्शनलाई ध्यानमा राख्दै नयाँदिल्ली नगरपालिका परिषद् (एनडीएमसी)ले सेन्ट्रल पार्क दुई दिनका लागि बन्द गरेको थियो । सुरक्षा व्यवस्थालाई ध्यानमा राखेर दिल्ली प्रहरीले उक्त क्षेत्रमा भारतीय नागरिक सुरक्षा संहिता (बीएनएसएस) को धारा १६३ अन्तर्गत निषेधाज्ञासमेत लागु गरेको थियो । घण्टौँ प्रदर्शन, सीजेपी र भाजपा समर्थकबीच नाराबाजी शुक्रबार साँझ अभिजीत दीपके र नेहा बोरालाई प्रहरीले नियन्त्रणमा लिएपछि पनि लामो समयसम्म प्रदर्शन जारी रह्यो । बीबीसीले कनट प्लेसको इनर सर्कलस्थित सेन्ट्रल पार्क वरपर र पालिका बजारको प्रवेशद्वार नम्बर १ नजिक ठूलो संख्यामा मानिस भेला भएका थिए । उनका अनुसार, त्यहाँ दुई समूह स्पष्ट रूपमा देखिएका थिए । एउटा समूह मतदाता नामावलीको विशेष गहन पुनरावलोकन (एसआईआर) र मुख्य निर्वाचन आयुक्त ज्ञानेश कुमारविरुद्ध नाराबाजी गरिरहेको थियो । अर्को समूह प्रधानमन्त्री नरेन्द्र मोदी र सत्तारूढ भारतीय जनता पार्टी (भाजपा) को समर्थनमा नारा लगाइरहेको थियो । रावका अनुसार, सुरुमा केही समय प्रहरीले हस्तक्षेप गरेको थिएन । करिब आधा घण्टापछि प्रहरीले भाजपाको समर्थनमा नाराबाजी गरिरहेको समूहलाई त्यहाँबाट हटाएको थियो । त्यसपछि दिल्ली प्रहरी र अर्धसैनिक बलका जवानहरूले सीजेपी समर्थित प्रदर्शन नियन्त्रणमा लिने प्रयास गरेका थिए । प्रहरीको कारबाहीका क्रममा केही प्रदर्शनकारी सडकमा बसेर नाराबाजी र धर्ना गर्न थालेका थिए । रावका अनुसार, प्रहरीले करिब ४५ मिनेटसम्म कारबाही गरी उनीहरूलाई हटाएको थियो । सडकमा बसिरहने प्रदर्शनकारीलाई नियन्त्रणमा लिइएको थियो । अबेर साँझसम्म पनि क्षेत्रमा ठूलो संख्यामा सुरक्षाकर्मी परिचालन गरिएको थियो । त्यसपछि प्रदर्शनको माहोल क्रमशः शान्त हुँदै गएको थियो । दीपकेलाई अज्ञात स्थानमा लगेको सीजेपीको आरोप सीजेपीले अभिजीत दीपकेलाई नियन्त्रणमा लिएपछि उनका कानुनी सल्लाहकार तथा वकिलसँग समेत सम्पर्क गर्न नदिइएको आरोप लगाएको छ । पार्टीले सामाजिक सञ्जाल एक्समा लेखेको छ, “दिल्ली प्रहरीले अभिजीत दीपकेलाई अज्ञात स्थानमा लगेको छ । उहाँसँग हाम्रो सम्पर्क पूर्ण रूपमा विच्छेद भएको छ । उहाँलाई वकिलहरूसँग कुरा गर्नसमेत दिइएको छैन । सरकारले देशका युवासँग आतंकवादीजस्तो व्यवहार किन गरिरहेको छ ?” पार्टीले आफूहरू समान अधिकार भएका भारतीय नागरिक भएको र संविधानले प्रदान गरेका अधिकार तथा सुरक्षाको हकदार रहेको उल्लेख गर्दै दीपकेलाई कहाँ लगिएको हो भन्नेबारे प्रहरीले जवाफ दिनुपर्ने माग गरेको छ । सीजेपीले दीपके राष्ट्रिय झण्डा बोकेर घरबाट निस्किएको उल्लेख गर्दै झण्डा बोकेर हिँड्नु कहिलेदेखि अपराध भयो भन्ने प्रश्नसमेत गरेको छ । शुक्रबार साँझ दिल्ली प्रहरीले दीपकेलाई उनी बस्दै आएको आवास परिसरबाट नियन्त्रणमा लिएको थियो । ‘लहरा दो तिरंगा’ मार्चमा सहभागी हुन राष्ट्रिय झण्डा बोकेर घरबाट निस्कने क्रममा प्रहरीले उनलाई रोक्दै नियन्त्रणमा लिइएको बताएको थियो । त्यसबेला दीपके कनट प्लेसस्थित सेन्ट्रल पार्कतर्फ जाँदै थिए । बीबीसी