विराटनगरको पहिलो जित, सुदूरपश्चिम ३५ रनले निराश

काठमाडौं । विराटनगर किंग्सले नेपाल प्रिमियर लिग (एनपीएल)को तेस्रो सिजनमा दुईपटकको उपविजेता सुदूरपश्चिम रोयल्सलाई ३५ रनले पराजित गरेको छ । योसँगै विराटनगरले तेस्रो सिजनमा पहिलो जित निकालेको छ । शनिबार (कात्तिक १४) कीर्तिपुरस्थित त्रिवि क्रिकेट रंगशालामा विराटनगरले प्रस्तुत गरेको १०६ रनको लक्ष्य पछ्याएको सुदूरपश्चिमले निर्धारित पाँच ओभरमा तीन विकेट गुमाएर ७० रन मात्र बनाउन सक्यो । वर्षाका कारण खेल पाँच ओभरमा छोट्ट्याइएको थियो । सुदूरपश्चिमलाई सस्तैमा रोक्न विराटनगरका आन्द्रे रसेल, रुपेस सिंह र एञ्जेलो म्याथ्युजले समान एक विकेट लिए । सुदूरपश्चिमका निम्ति स्कट कुगेलेइनले सर्वाधिक २८ रन बनाए । आरिफ शेख र सैफ जैबले समान १७ रन जोडे । त्यसअघि, टस हारेर ब्यटिङमा उत्रिएको विराटनगरले सुदूरपश्चिमविरुद्ध पाँच ओभरमा दुई विकेट गुमाएर १०५ रन बनाएको थियो । विराटनगरका सेहन जयसुर्याले ३९ रनको योगदान गरे । उनले ११ बलमा दुई चौका र पाँच छक्का प्रहार गरे । आन्द्रे रसेलले २९, लोकेश बमले २५ रन बनाए । सुदूरपश्चिमका अभिनाश बोहराले दुवै विकेट लिए । उनले दुई ओभरमा २८ रन खर्चिए । उनले पहिलो विकेटमा जसुर्यालाई एलबीडब्ल्यूको सिकार बनाए । २.३ ओभरमा अम्पायरले उक्त बलमा नटआउटको संकेत गरेका थिए । तर, सुदूरपश्चिमले डीआरएसको अपिल गर्दा उक्त निर्णय उल्ट्याउँदै टीभी अम्पायरले एलबीडब्ल्यूको संकेत गरेका हुन् ।दोस्रो विकेटमा उनले लोकेशलाई कप्तान दीपेन्द्रसिंह ऐरीबाट क्याच गराएका थिए । विराटनगरले पहिलो खेलमा चितवन राइनोजसँग हार व्यहोरेको थियो । कात्तिक १२ गते भएको खेलमा कर्णाली याक्ससँग चार विकेटको पराजय भोगेको थियो ।सुदूरपश्चिमले भने जारी प्रतियोगितामा दोस्रो हार व्यहोरेको छ । टोलीले लुम्बिनी लायन्ससँग पहिलो खेल हार्दा पोखरा एभेन्जर्सविरुद्ध ६ विकेटको जित निकालेको थियो । खेलमा वर्षाको प्रभाव खेल वर्षाका कारण निकै प्रभावित भयो । खेल पूर्वनिर्धारित समयभन्दा चार घण्टा ढिला सुरु भएको थियो । आयोजक नेपाल क्रिकेट संघ (क्यान)ले वर्षाका कारण बेलुका ७ः२५ बजे टस गर्ने जनाएको थियो । खेल ७ः४१ बजे सुरु गर्ने जानकारी गराएको थियो । तर, टस त्यस समयमा हुन सकेन । पिचको स्थिति नराम्रो भएको भन्दै आफ्ना खेलाडी घाइते हुन सक्ने भनेर सुदूरपश्चिमले खेल्न मानेको थिएन । त्यसपछि मैदानमा अन्योल सिर्जना भयो । यस क्रममा सुदूरपश्चिमका खेलाडीले केही बेर मैदान छाडेका थिए । पछि दर्शकको ‘दबाब’ र क्यानका सचिव पारस खड्काले सम्झाएपछि सुदूरपश्चिम खेल्न तयार भएको देखिएको थियो । खेल राति ९ः१५ बजे मात्र सुरु भएको थियो । शनिबारै बिहानका निम्ति तय गरिएको लुम्बिनी र चितवनबीचको खेल वर्षाका कारण रद्द भएको थियो । खेल रद्द भएसँगै दुवै टोलीले अंक बाँडेका थिए ।