विराटनगर किंग्समा विदेशी र स्वदेशी हस्ती, उपाधि जित्ने लक्ष्य

काठमाडौं । एनपीएल सिजन ३ मा आन्द्रे रसेल, चरिथ अस्लंका र एन्जेलो म्याथ्युज जस्ता विश्व चर्चित खेलाडीलाई अनुबन्ध गरेको देख्दा विराटनगर किंग्सले उपाधिमाथि कडा आँखा लगाएको देखिन्छ । त्यसै पनि विराटनगर नेपाल प्रिमियर लिग (एनपीएल) को पहिलो सिजनदेखि नै चर्चामा आएको टोली हो । टोलीले पहिलो सिजनमा मार्टिन गप्टिल, क्रिस सोलजस्ता खेलाडी भित्र्याएर चर्चा बटुलेको थियो। दोस्रो सिजनमा त झन् फाफ डुप्लेसिस र मर्चेन्ड डी लाङजस्ता खेलाडीलाई ल्याएर आफ्नो हाइप बढाएको थियो । यद्यपि टोलीले चर्चा अनुसारको उपलब्धि हात पार्न सकेको छैन । पहिलो सिजनमा लिग चरणमै सीमित भएको विराटनगरले दोस्रो सिजनमा भने प्रभावकारी रूप देखाउँदै प्लेअफ सम्मको यात्रा तय गरेको थियो । किंग्सको टोलीमा रहेका राष्ट्रिय खेलाडीहरू पनि कोहीभन्दा कोही कम छैनन् । एकदिवसीय राष्ट्रिय क्रिकेट टोलीका कप्तान सन्दीप लामिछानेको नेतृत्वमा रहेको विराटनगरमा बसिर अहमद, प्रतिश जिसी, लोकेश बमजस्ता चर्चित खेलाडी छन् । विराटनगरको प्रशिक्षण यसपटक पनि धम्मिका प्रसादले नै सम्हाल्ने छन् । दोस्रो सिजनमा पनि प्रसाद नै विराटनगरका प्रशिक्षक थिए । विराटनगरको बलिङ कप्तान सन्दीप र प्रतिसमै निर्भर रहने देखिन्छ । दुई सिजनमा सन्दीपले २३ र प्रतिसले १८ विकेट लिएका छन् । अस्लंकाको आगमनले टोलीको ब्याटिङ पनि बलियो बनेको छ । अस्लंकालाई लोकेश र बसिरले प्रमुख ब्याटरका रूपमा साथ दिने छन्। दुई सिजनमा गरी बसिरले ३७२ र लोकेशले ३१२ रन बनाएका छन् । आन्द्रे रसेल टोलीका प्रमुख अलराउन्डरका रूपमा रहनेछन् । विश्वभरका फ्रेन्चाइज लिगको अनुभव लिएका उनीबाट टोलीले ठूलो आस गरेको छ । रसेल ब्याटिङ र बलिङ दुवैमा घातक बन्नेछ। उनको प्रदर्शनले विराटनगरको नतिजामा सकारात्मक प्रभाव पर्ने विश्वास गर्ने नै छ। यसैगरी, विराटनगरले शुभम रन्जानेलाई निरन्तरता दिएको छ । गत सिजन रन्जानेले ८७ रन प्रहार गर्नुका साथै पाँच विकेट लिएका थिए। विराटनगरले एनपीएलको तयारी भारतमा गरेको थियो । त्यहाँ रणजी ट्रफी खेलेका खेलाडीसँग प्रशिक्षण गर्नुका साथै स्थानीय क्लबसँग अभ्यास खेल पनि भएको थियो । भारतको तयारीले एनपीएलमा उत्कृष्ट प्रदर्शन हुने क्लबको विश्वास छ । विराटनगर किंग्स एनपीएलको उपाधिको खोजीमै छ। एमडीएम ड्रिम्स स्पोर्टसले १ करोड ५१ लाख रुपैयाँमा विराटनगरको स्वामित्व खरिद गरेको थियो। टोलीका मालिकहरूले यसपालि पनि खुल्ला हृदयले विदेशी खेलाडीका लागि लगानी गरेका छन्। त्यसको प्रतिफल भने हेर्न बाँकी नै छ ।