र्‍यापर निकी मिनाज ह्वाइट हाउसकी प्रेस सचिव बन्ने चर्चा

काठमाडौं । अमेरिकी र्‍यापर निकी मिनाज ह्वाइट हाउसको प्रेस सचिव बन्न सक्ने चर्चा सुरु भएको छ । अमेरिकी राष्ट्रपति डोनाल्ड ट्रम्पकी समर्थक मिनाजको नाम सम्भावित प्रेस सचिवका रूपमा चर्चामा आएपछि अमेरिकी सञ्चारमाध्यम र सामाजिक सञ्जालमा यसबारे बहस हुन थालेको हो । यद्यपि, उनलाई उक्त पदमा नियुक्त गर्ने औपचारिक घोषणा भने भएको छैन । मिनाज हालै ट्रम्पसँग एयर फोर्स वनमा यात्रा गर्दै मिशिगनको पोर्ट ह्युरोनमा आयोजित कार्यक्रममा सहभागी भएकी थिइन् । यात्राका क्रममा उनले ट्रम्पको प्रशासन र उपलब्धिबारे प्रश्नहरूको जवाफ दिँदै पत्रकार सम्मेलनमा प्रेस सचिवले गर्ने शैलीमा नक्कली अन्तर्वार्ता दिएको भिडियो सार्वजनिक भएको थियो । ह्वाइट हाउसका सञ्चार निर्देशक स्टिभन च्युङले उक्त भिडियो सामाजिक सञ्जाल एक्समा साझा गर्दै लेखेका थिए, ‘मलाई लाग्छ, हामीले नयाँ ह्वाइट हाउस प्रेस सचिव भेट्टायौँ !’ उनको यो टिप्पणीले मिनाज प्रेस सचिव बन्न सक्ने चर्चालाई थप बल पुर्‍याएको हो । ट्रम्पले पनि सार्वजनिक कार्यक्रममा मिनाजको प्रशंसा गरेका थिए । मिनाजले आफूलाई ट्रम्पको ‘नम्बर वान फ्यान’ बताउँदै आएकी छन् । उनले ट्रम्पको युवा पुस्ताका लागि ल्याइएको वित्तीय योजनालाई समर्थन गर्दै त्यसमा लगानी गर्ने घोषणा पनि गरेकी थिइन् । ह्वाइट हाउसको प्रेस सचिव पदमा पछिल्लो समय छोटो अवधिमै फेरबदल भइरहेको छ । यसअघि केटी जकारियाले अक्टोबरमा पाँच दिनमै पद छाडेकी थिइन् भने क्यारोलिन लेभिटले अगस्टमा पद छाडेकी थिइन् । त्यसपछि उक्त पदका लागि मिनाजको नाम चर्चामा आएको हो ।