बुटवलमा महिलामाथि गोली प्रहार गरी फरार भारतीय नागरिक पक्राउ

बुटवल । गोली प्रहार गरी महिलाको हत्या प्रयास गरेर फरार रहेका एक भारतीय नागरिकलाई प्रहरीले पक्राउ गरेको छ। पक्राउ पर्नेमा २६ वर्षीय सितारे आलम अन्सारी रहेका छन्। २०८२ वैशाख ६ गते पाल्पाको रैनादेवी गाउँपालिका–३, बम्घा घर भई हाल रुपन्देहीको बुटवल उपमहानगरपालिका–११, बुद्धनगरमा नास्ता पसल सञ्चालन गर्दै आएकी २९ वर्षीया विपना भन्ने टिका बिष्ट क्षेत्रीमाथि अन्सारीले गोली प्रहार गरेका थिए। घटनापछि उनी भारततर्फ फरार भई लुकिछिपी बस्दै आएका थिए। अन्सारी नेपाल प्रवेश गरी नवलपरासीमा रहेको विशेष सूचनाका आधारमा २०८३ कात्तिक १ गते दिउँसो अन्दाजी १५:०० बजे नवलपरासीको पाल्हीनन्दन गाउँपालिका–३, विलासपुरबाट उनलाई पक्राउ गरिएको हो। लुम्बिनी प्रदेश प्रहरी कार्यालय, दाङ र जिल्ला प्रहरी कार्यालय नवलपरासीबाट खटिएको संयुक्त प्रहरी टोलीले उनलाई नियन्त्रणमा लिएको हो। प्रहरीले अन्सारीको साथबाट यूपी ५६ एएच ०५१६ नम्बरको भारतीय मोटरसाइकलसमेत बरामद गरेको छ। पक्राउ परेका अन्सारीमाथि थप आवश्यक अनुसन्धान भइरहेको प्रहरीले जनाएको छ।