प्रधानमन्त्री बालेनको भारत भ्रमण आगामी मङ्सिर दोस्रो साता हुने

प्रधानमन्त्री वालेन्द्र शाह आगामी मङ्सिर दोस्रो साता भारत भ्रमणमा जाने भएका छन् । परराष्ट्रमन्त्री शिशिर खनालले सञ्चारकर्मीसँग कुरा गर्दै मन्त्री खनालले विभिन्न सञ्चारमाध्यममा सार्वजनिक भएका समाचारमा उल्लेख गरिएजस्तै समय आसपास प्रधानमन्त्रीको भारत भ्रमण हुने बताए । यद्यपि, भ्रमणको औपचारिक मिति तय गर्न बाँकी रहेको उनको भनाइ छ । वर्तमान सरकार गठन भएदेखि नै भारत सरकारसँग नियमित सम्पर्क भइरहेको उल्लेख गर्दै मन्त्री खनालले प्रधानमन्त्रीको भ्रमणलाई परिणाममुखी र उपलब्धिमूलक बनाउने तयारी भइरहेको बताए । भ्रमणका क्रममा व्यापार तथा पारवहन, कनेक्टिभिटी, ऊर्जा र सीमा व्यवस्थापनलगायतका विषयमा सकारात्मक प्रगति हासिल गर्ने नेपालको अपेक्षा रहेको उनले बताए । ‘भ्रमणका दौरान ‘ट्रेड एन्ड ट्रान्जिट’, कनेक्टिभिटी, ऊर्जा, सीमालगायत विषयमा केही न केही सकारात्मक प्रगति होस् भन्ने छ’, मन्त्री खनालले भने । प्रधानमन्त्रीको भ्रमणका क्रममा ठूला पूर्वाधार तथा जलविद्युत् परियोजनाको उद्घाटन र शिलान्यास गर्नुका साथै विभिन्न सम्झौतामा हस्ताक्षर गर्ने तयारी रहेको बताइएको छ । गत चैत १३ गते सरकारको नेतृत्व सम्हालेयता प्रधानमन्त्री शाहको यो पहिलो भारत भ्रमण हुनेछ । भ्रमणलाई नेपाल–भारत सम्बन्ध थप सुदृढ बनाउने र द्विपक्षीय सहकार्यका विभिन्न क्षेत्रमा ठोस उपलब्धि हासिल गर्ने अवसरका रूपमा हेरिएको छ ।