‘परिवेश’ ५२औं शृंखलामा, कलाकार तथा प्राविधिक सम्मानित

काठमाडौं । निरन्तर प्रसारण हुँदै आएको टेलिसिरियल ‘परिवेश’ ५२औं शृंखलामा प्रवेश गरेको छ । सिरियलले ५२ भागको यात्रा पूरा गरेको अवसरमा आइतबार काठमाडौंको जरङखुस्थित साझा पार्टी प्यालेसमा कलाकारलाई सम्मान गरिएको छ । नेपाल चलचित्र कलाकार संघका अध्यक्ष उत्तम केसीको प्रमुख आतिथ्यतामा आयोजित कार्यक्रममा विभिन्न क्षेत्र तथा संघसंस्थामा आबद्ध व्यक्तित्वहरूको उपस्थिति थियो । कार्यक्रममा सिरियलका कलाकार, प्राविधिक तथा निर्माण टोलीका सदस्यहरूलाई सम्मान तथा प्रमाणपत्र प्रदान गरिएको थियो । कार्यक्रममा प्रमुख अतिथि केसीले कलाकारिता क्षेत्रमा निरन्तर मिहिनेत, लगनशीलता र समर्पण आवश्यक रहेको बताउनुभयो । स्थानीय कलाकारहरूलाई समेटेर ‘परिवेश’ निर्माण गरिएकोमा खुशी व्यक्त गर्दै उहाँले कलाकार संघका तर्फबाट आवश्यक सहयोग र सहकार्य गर्न आफूहरू तयार रहेको प्रतिबद्धता जनाउनुभयो । त्यस्तै, उद्योग वाणिज्य संघ काठमाडौं जिल्लाका सदस्य तथा व्यवसायी चन्द्रबहादुर थापाले सिरियलको सफलताको शुभकामना व्यक्त गर्दै सकारात्मक र सिर्जनात्मक कार्यमा आफ्नो सहयोग रहने प्रतिबद्धता जनाउनुभयो । सिरियलकी लेखक तथा निर्देशक दीपा घिमिरेले विभिन्न चुनौती र उतारचढावका बाबजुद ‘परिवेश’लाई ५२औं शृंखलासम्म पुर्‍याउन सफल भएको बताउनुभयो । यस यात्रामा साथ, सहयोग र हौसला प्रदान गर्ने कलाकार, प्राविधिक, सहयोगी तथा दर्शकप्रति उनले आभार व्यक्त गर्नुभयो । डीएस इन्टरटेन्मेन्टको प्रस्तुति रहेको ‘परिवेश’ दीपा युट्युब च्यानलमार्फत प्रत्येक शुक्रबार साँझ ७ बजे प्रसारण हुँदै आएको छ । सामाजिक परिवेश, पारिवारिक सम्बन्ध र जीवनका विविध पक्षलाई कथावस्तु बनाइएको सिरियलले ५२औं भागसम्मको यात्रा पूरा गर्नुलाई निर्माण टोलीले महत्त्वपूर्ण उपलब्धिका रूपमा लिएको छ । सिरियलमा दीपा घिमिरे, भगवान भण्डारी, रामप्रसाद महर्जन, देवराज लामिछाने, इच्छाराम दुलाल, योगेश्वरी श्रेष्ठ, सावित्रा भट्ट, लक्ष्मण भण्डारी, नीलु श्रेष्ठ, विकास श्रेष्ठ, अमृतमान श्रेष्ठ, सुशान फुयाँल, अम्बिका खतिवडा, दिलीप थापा, सुप्रीम राउत, सरला गौतम, नमराज तिवारी र सलिना थापालगायत कलाकारले अभिनय गर्दै आउनुभएको छ । सिरियलका निर्माता सुदर्शन घिमिरे हुनुहुन्छ भने सम्पादन कविता राईले गर्नुभएको छ । त्यसैगरी, छायांकनको जिम्मेवारी मनोज मल्ल र मेकअपको जिम्मेवारी शर्मिला श्रेष्ठले सम्हाल्नुभएको छ ।