मंसिर १७ देखि नवौँ बर्दघाट महोत्सव

नवलपरासी । कृषि, पर्यटन, उद्योग र व्यापार, समृद्ध बर्दघाटको बलियो आधार भन्ने नाराका साथ पश्चिम नवलपरासीको बर्दघाट उद्योग वाणिज्य संघले आगामी मंसिर १७ देखि २९ गतेसम्म ‘नवौँ बर्दघाट महोत्सव–२०८३’ आयोजना गर्ने भएको छ । महोत्सवमा करिब तीन करोड रुपैयाँ बराबरको कारोबार गर्ने र दुई लाख दर्शक भित्र्याउने लक्ष्य आयोजकले लिएको छ । संघले पत्रकार सम्मेलन गरी महोत्सव आयोजनाबारे जानकारी गराएको हो । बर्दघाट–४ हरियालीनगरस्थित बर्दघाट मण्डपमा सञ्चालन हुने महोत्सवमा स्थानीय कृषि तथा घरेलु उत्पादन, राष्ट्रिय तथा स्थानीय कलाकारका सांस्कृतिक प्रस्तुति र बाल उद्यान मुख्य आकर्षणका रूपमा रहने बताइएको छ । महोत्सव सम्पन्न गर्न करिब ७० लाख रुपैयाँ खर्च हुने अनुमान गरिएको संघका सचिव डिल्लीराज कँडेलले जानकारी दिनुभयो । उहाँका अनुसार महोत्सवले स्थानीय उत्पादनको बजारीकरण, पर्यटन प्रवर्द्धन, व्यापारिक गतिविधि विस्तार तथा धार्मिक, ऐतिहासिक र मौलिक संस्कृतिको प्रचार प्रसारमा महत्त्वपूर्ण योगदान पुर्‍याउने अपेक्षा गरिएको छ । आयोजकका अनुसार महोत्सवमा विभिन्न क्षेत्रका गरी कुल दुई सय ५० स्टल रहनेछन् । संघमा आबद्ध तथा नवीकरण भएका व्यवसायीलाई मंसिर १५ गतेसम्म स्टल बुकिङ गर्दा ५० प्रतिशत छुटको व्यवस्था गरिएको छ भने स्थानीय पालिका तथा घरेलु उद्योगबाट सिफारिस प्राप्त कृषि, हस्तकला र घरेलु उत्पादनका सामग्रीका लागि निःशुल्क स्टल उपलब्ध गराइनेछ । महोत्सव प्रवेशका लागि साधारण टिकट दर सय रुपैयाँ निर्धारण गरिएको छ भने विद्यार्थीलाई ३० प्रतिशत छुट तथा जेष्ठ नागरिक, अशक्त तथा अपांगता भएका व्यक्तिलाई निःशुल्क प्रवेशको व्यवस्था गरिएको छ । टिकट काटेर प्रवेश गर्ने सम्पूर्ण दर्शकका लागि दुर्घटना बिमाको समेत व्यवस्था गरिएको संघका अध्यक्ष लेखनाथ न्यौपानेले जानकारी दिनुभयो । उहाँले कृषि क्षेत्रलाई विशेष प्राथमिकतामा राखेर महोत्सव आयोजना गर्न लागिएको जानकारी गराउँदै संघले विपत् व्यवस्थापन कोषलाई एक करोड रुपैयाँ पुर्‍याउने लक्ष्यसमेत लिएको जानकारी दिनुभयो । महोत्सवमा जिल्लाभित्र उत्पादित घरेलु तथा कुटिर उद्योगका सामग्री, दैनिक उपभोग्य वस्तु, जडीबुटी, कृषि उत्पादन, शैक्षिक तथा स्वास्थ्य सामग्री, बैंकिङ तथा वित्तीय संस्था, होटल तथा रेस्टुरेन्टका स्टल रहनेछन् । साथै बाल उद्यान र चर्चित राष्ट्रिय तथा स्थानीय कलाकारका सांस्कृतिक प्रस्तुति पनि महोत्सवका आकर्षण हुने संघका वरिष्ठ उपाध्यक्ष तारा गौतमले जानकारी दिनुभयो । आयोजकका अनुसार महोत्सवले स्थानीय उद्यमी, किसान, व्यवसायी तथा साना उद्योगीलाई आफ्नो उत्पादन र सेवा प्रवर्द्धन गर्ने अवसर प्रदान गर्नुका साथै बर्दघाट क्षेत्रको आर्थिक तथा पर्यटकीय गतिविधि बढाउन सहयोग पुर्‍याउने अपेक्षा गरिएको छ ।