थिमिमा ६२ वर्षपछि जीवित देवी कुमारीको दर्शनसहित टीका ग्रहण गर्ने परम्परा पुनः सुरु

भक्तपुर । भक्तपुरको मध्यपुरथिमिमा ६२ वर्षपछि जीवित देवी कुमारीको दर्शन गरी टीका ग्रहण गर्ने परम्परा पुनः सुरु भएको छ। स्थानीय शाक्य, बज्राचार्य, कर्माचार्य तथा संस्कृति संरक्षणकर्मीहरूको पहलमा धार्मिक, सामाजिक एवं ऐतिहासिक महत्त्व बोकेको कुमारीको दर्शन गर्ने परम्परा ६२ वर्षपछि पुनः सुरु भएको हो। यस वर्ष मध्यपुरथिमि चपाचोकी चार वर्षीया आयुषी बज्राचार्यलाई जीवित देवी कुमारीका रूपमा नियुक्त गरिएको थियो। उनलाई आज आदर्शस्थित लायकु दरबारमा राखेर सर्वसाधारणले दर्शन गर्नुका साथै कुमारीको हातबाट टीका ग्रहण गरेका थिए। संस्कृतिकर्मी एवं पमा नाइके श्यामकाजी पमा श्रेष्ठका अनुसार मध्यपुरथिमिमा ६२ वर्षअघिसम्म जीवित देवी कुमारीको पूजा गर्ने परम्परा रहे पनि आर्थिक अभावका कारण रोकिएको थियो। धार्मिक, सामाजिक तथा सांस्कृतिक क्षेत्रका स्थानीय अगुवाहरूको सक्रियतामा उक्त परम्परालाई पुनर्जीवित गरिएको उनले बताए। राजा राय मल्लले नेपाल संवत् ६११ मा जीवित देवी कुमारीलाई तलेजु भवानीको दोस्रो रूपका रूपमा पूजा गर्ने गरेको इतिहास रहेको उल्लेख गर्दै श्रेष्ठले अब यस परम्पराले निरन्तरता पाउने विश्वास व्यक्त गरे। पमा नाइके श्रेष्ठले भने, ‘मध्यपुरथिमिमा करिब ६० देखि ६२ वर्षपछि आज जीवित देवी कुमारीको पूजा गर्ने, दर्शन गर्ने र टीका लगाउने परम्परा पुनः सुरु भएको छ।’ उनका अनुसार नवनियुक्त कुमारीका पिता सुरेश बज्राचार्यले कुमारीलाई बोकेर उनको घरमा ल्याएका थिए। ‘कुमारीको हातबाट टीका ग्रहण गरी दक्षिणा र सगुन दिएपछि बालकुमारी परिक्रमा गराएर लायकु दरबारमा दिनभर राख्यौँ,’ उनले भने, ‘त्यहाँ आएका स्थानीयले कुमारीको हातबाट टीका ग्रहण गरे। अब यो परम्परालाई निरन्तरता दिइनेछ।’