तीन वर्षभित्र देशका ८ सहरमा फ्लडलाइटसहितकाे क्रिकेट रंगशाला बनाइनेछ: मन्त्री लम्साल

काठमाडौं । भौतिक पूर्वाधार तथा यातायातमन्त्री सुनिल लम्सालले देशका आठ प्रमुख सहरमा फ्लडलाइटसहित कम्तीमा आठ हजार दर्शक क्षमताका क्रिकेट रंगशाला निर्माण गर्ने योजना अघि बढाइएको बताएका छन्। तीन वर्षभित्र निर्माण सम्पन्न गर्ने लक्ष्य राखिएको यो योजनाले नेपाली क्रिकेटलाई देशव्यापी बनाउन सहयोग पुग्ने उनको विश्वास छ। नेपाल प्रिमियर लिग (एनपीएल) को तेस्रो संस्करण सुरु हुन लागेको अवसरमा सामाजिक सञ्जाल फेसबुकमार्फत शुभकामना दिँदै मन्त्री लम्सालले ‘होम एन्ड अवे’ प्रणालीमा प्रतियोगिता सञ्चालन गर्न सकिने गरी रंगशाला निर्माणको प्रक्रिया अघि बढाइएको जानकारी दिएका हुन्। उनले उक्त योजनाले एनपीएललाई देशका विभिन्न सहरमा विस्तार गर्नुका साथै नेपाली क्रिकेटको विकासमा नयाँ आयाम थप्ने विश्वास व्यक्त गरेका छन्। साथै, योजनालाई सफल बनाउन नेपाल क्रिकेट संघ (क्यान) लाई पनि सोहीअनुसार आवश्यक तयारी अघि बढाउन आग्रह गरेका छन्। एनपीएलको तेस्रो संस्करण आजदेखि सुरु हुँदैछ। आठ प्रमुख सहरमा आधुनिक सुविधासहितका क्रिकेट रंगशाला निर्माण भएमा प्रतियोगिताका खेल देशका विभिन्न स्थानमा सञ्चालन गर्न सहज हुने अपेक्षा गरिएको छ।