डोल्पा कारागारबाट भागेकाहरूले कसरी खने झन्डै ४ मिटरकाे सुरुङ ?

डोल्पा । डोल्पा जिल्ला कारागारबाट आठ जना कैदीबन्दीले सुरुङ खनेर भाग्न पर्खालको कमजोर संरचना, नरम माटो र सीसीटीभीको निगरानी नभएको क्षेत्रको फाइदा उठाएको प्रारम्भिक अनुसन्धानबाट देखिएको छ। जेलर दीर्घ आरसीका अनुसार कैदीबन्दीले सुत्ने कोठाको झ्यालमा रहेको रड निकालेर सुरुङ खन्न प्रयोग गरेका थिए। आठै जनालाई छुट्टै हलजस्तो कोठामा राखिएको थियो। उनीहरूले सुत्ने कोठाबाट पर्खालमुनि सुरुङ खनेर शौचालयको सेफ्टी ट्यांकी हुँदै बाहिर निस्किएको देखिएको छ। कारागारको पर्खालमुनि सिमेन्टको पक्की संरचना (डीपीसी) नभएकाले त्यहाँबाट सुरुङ खन्न सहज भएको जेलर आरसीले बताए। उनका अनुसार उक्त कारागार खुला प्रकृतिको हो। कैदीबन्दी भागेको क्षेत्र दुई अग्ला पर्खालबीच पर्ने र सीसीटीभीको निगरानीमा नरहेकाले उनीहरू कुन समयमा भागे भन्ने यकिन हुन सकेको छैन। घटनाको अनुसन्धानमा खटिएका एक प्रहरी अधिकारीका अनुसार सुरुङ खन्न प्रयोग गरिएका दुईवटा साना फलामे रडका टुक्रा र तरकारी काट्न प्रयोग हुने एउटा पुरानो चुलेसी बरामद भएको छ। यद्यपि, झ्यालको रड निकालेर नै सुरुङ खनिएको भन्ने कुरा आफूले पुष्टि गर्न नसक्ने ती अधिकारीले बताएका छन्। ती औजार कैदीबन्दीले कारागारभित्र कसरी प्राप्त गरे भन्ने विषयमा अनुसन्धान भइरहेको छ। प्रहरीका अनुसार सुरुङको लम्बाइ १५ फिट दुई इन्च अर्थात् झन्डै चार मिटर छ। सुरुङ खनेको स्थानमा बलौटे माटो भेटिएको छ। उक्त माटो हातैले खन्न र खोस्रन सकिने खालको रहेको अनुसन्धानमा संलग्न अधिकारीले बताएका छन्। शुक्रबार बेलुकीदेखि परेको पानीले जमिन भिजेर नरम भएको र चिसो बढेकाले पनि सुरुङ खन्न सहज भएको हुन सक्ने प्रहरीको प्रारम्भिक विश्लेषण छ। आठ जना मिलेर काम गरेको भए एकै दिनमा पनि सुरुङ तयार हुन सक्ने एक अधिकारीको भनाइ छ। तर, अर्का प्रहरी अधिकारीले भने सुरुङ हेर्दा पुरानो देखिएकाले कैदीबन्दीले केही दिनदेखि नै थोरैथोरै खन्दै आएको हुन सक्ने आशंका गरेका छन्। सुरुङ खनेपछि निस्किएको माटो फाल्न उनीहरूले पानी नभएको छुट्टै सेफ्टी ट्यांकी प्रयोग गरेको प्रहरीको अनुमान छ। उक्त ट्यांकी दुई अग्ला पर्खालबीच पर्ने र सीसीटीभीको निगरानीमा समेत नरहेकाले माटो फालेको कसैले थाहा नपाएको हुन सक्ने प्रहरी अधिकारीको भनाइ छ। आठ जना कैदीबन्दी फरार भएपछि उनीहरूको खोजीका लागि नेपाल प्रहरी र सशस्त्र प्रहरी गरी झन्डै डेढ सय सुरक्षाकर्मी परिचालन गरिएको छ। जिल्ला प्रहरी कार्यालय डोल्पाका विभिन्न युनिटबाट एक सयभन्दा बढी प्रहरी २५ स्थानमा खटिएका छन् भने सशस्त्र प्रहरीका ३३ जना पनि खोजीमा संलग्न छन्।