एनपिएल : लुम्बिनीविरुद्ध सुदूरपश्चिमका व्याटर निरिह

काठमाडौं । साविक विजेता लुम्बिनी लायन्सले नेपाल प्रिमियर लिग (एनपिएल) को तेस्रो संस्करणमा सुखद सुरुआत गरेको छ । सोमबार कीर्तिपुरस्थित त्रिवि अन्तर्राष्ट्रिय क्रिकेट रंगशालामा भएको खेलमा लुम्बिनीले सुदूरपश्चिम रोयल्सलाई सात विकेटले पराजित गर्दै प्रतियोगितामा विजयी यात्रा सुरु गरेको हो । सुदूरपश्चिमले दिएको ८८ रनको सामान्य लक्ष्य लुम्बिनीले ९ ओभर ५ बलमा तीन विकेट गुमाएर पूरा गर्‍यो । यस जितसँगै लुम्बिनीले एनपिएलको इतिहासमा लिग चरणमा पहिलोपटक सुदूरपश्चिमलाई हराउने सफलता पनि हासिल गरेको छ । यसअघि प्रतियोगिताका दुई संस्करणमा आमनेसामने हुँदा लुम्बिनीले सुदूरपश्चिमलाई लिग चरणमा पराजित गर्न सकेको थिएन । लुम्बिनीको जितमा ओपनर डार्सी सर्ट र आसिफ शेखले आक्रामक ब्याटिङ गर्दै टोलीलाई सहज जिततर्फ डोर्‍याउनुभयो । सर्टले मात्र १८ बलमा चार चौका र तीन छक्काको मद्दतमा सर्वाधिक ४० रन बनाउनुभयो । उहाँले सुरुआतदेखि नै आक्रामक शैली अपनाउँदै सुदूरपश्चिमका बलरमाथि दबाब सिर्जना गर्नुभएको थियो । अर्का ओपनर आसिफ शेखले ३२ रनको योगदान दिनुभयो । सर्ट र आसिफले पहिलो विकेटका लागि ७१ रनको साझेदारी गर्दै लुम्बिनीको जितको आधार तयार पार्नुभयो । दुवै ओपनरको उत्कृष्ट प्रदर्शनका कारण लुम्बिनीले लक्ष्य पछ्याउने क्रममा कुनै ठूलो दबाब सामना गर्नुपरेन । निरोशन डिक्वेला सात रनमा बोल्ड हुँदा शमिम हुसेन एक रनमा आउट हुनुभयो । कप्तान रोहित पौडेल पाँच रनमा अविजित रहनुभयो । सुदूरपश्चिमका बलरमध्ये अनिल खरेलले दुई विकेट लिँदा कप्तान दीपेन्द्रसिंह ऐरीले एक विकेट हात पार्नुभयो । यद्यपि, लुम्बिनीका ब्याटरलाई ठूलो साझेदारी गर्नबाट रोक्न सुदूरपश्चिमका बलर सफल भएनन् । किशोर र शेरको घातक बलिङयसअघि टस हारेर पहिले ब्याटिङ गरेको सुदूरपश्चिम रोयल्सले कमजोर प्रदर्शन गर्दै १७ ओभर २ बलमा सबै विकेट गुमाएर ८७ रन मात्र बनाउन सक्यो । लुम्बिनीका बलरले सुरुदेखि नै दबाब कायम राखेपछि सुदूरपश्चिमको ब्याटिङ क्रम लामो समय टिक्न सकेन । लुम्बिनीको बलिङमा किशोर महतो र शेर मल्लले उत्कृष्ट प्रदर्शन गर्नुभयो । किशोरले चार विकेट लिनुभयो भने शेरले तीन विकेट झार्नुभयो । उहाँहरूको प्रभावशाली बलिङका कारण सुदूरपश्चिम ठूलो योगफल बनाउन असफल भयो । कप्तान रोहित पौडेल, तिलकराज भण्डारी र शाड्ली भान शाकवाइकले पनि एक–एक विकेट लिनुभयो । सुदूरपश्चिमका लागि कप्तान दीपेन्द्रसिंह ऐरीले सर्वाधिक २७ रन बनाउनुभयो । अनिल खरेल १७ रनमा अविजित रहनुभयो । सैफ जैबले १३ रन बनाउँदा विनोदले नौ तथा इशान पाण्डेले सात रन जोड्नुभयो । ब्रान्डन म्याकमुलेन दुई रनमा आउट हुँदा शेर्फन रदरफोर्डले एक रन मात्र बनाउन सक्नुभयो । स्कट कुग्गेलाइन र हेमन्त धामी खाता नखोली आउट हुनुभयो । अन्य ब्याटरले पनि उल्लेख्य योगदान दिन नसक्दा सुदूरपश्चिम ८७ रनमै समेटियो । लुम्बिनीका बलरले नियमित अन्तरालमा विकेट लिँदै विपक्षी टोलीलाई ठूलो साझेदारी बनाउन दिएनन् । एनपिएलमा पहिलोपटक डीआरएस प्रयोगतेस्रो संस्करणको एनपिएलमा नेपालमा पहिलोपटक निर्णय पुनरावलोकन प्रणाली (डीआरएस) प्रयोगमा आएको छ । लुम्बिनी र सुदूरपश्चिमबीचको खेलमा उक्त प्रणाली प्रयोग गरिएको थियो । खेलको दोस्रो ओभरको अन्तिम बलमा लुम्बिनीका शेर मल्लले एलबीडब्लु (लेग बिफोर विकेट) को अपिल गर्नुभएको थियो । तर, मैदानी अम्पायरले आउट नदिएपछि लुम्बिनीका कप्तान रोहित पौडेलले डीआरएस लिने निर्णय गर्नुभयो । यद्यपि, पुनरावलोकनमा लुम्बिनीको अपिल सफल हुन सकेन । डीआरएसको प्रयोगले एनपिएलको तेस्रो संस्करणलाई थप प्रविधिमैत्री बनाएको छ । अम्पायरको निर्णयमा पुनरावलोकन गर्ने सुविधाले खेलमा निर्णयको शुद्धता बढाउन सहयोग पुग्ने अपेक्षा गरिएको छ । प्रधानमन्त्री शाहद्वारा प्रतियोगिताको उद्घाटनयसअघि प्रधानमन्त्री बालेन्द्र शाहले सोमबार कीर्तिपुरस्थित त्रिवि अन्तर्राष्ट्रिय क्रिकेट मैदानमा एनपिएलको तेस्रो संस्करण उद्घाटन गर्नुभएको थियो । प्रधानमन्त्री शाहले मैदानमा बल अम्पायरलाई हस्तान्तरण गरेसँगै प्रतियोगिताको औपचारिक सुरुआत भएको थियो । एनपिएलअन्तर्गत मंगलबार दुई खेल हुनेछन् । पहिलो खेलमा विराटनगर किंग्स र चितवन राइनोज आमनेसामने हुनेछन् । उक्त खेल दिउँसो साढे १२ बजे सुरु हुनेछ । त्यसैगरी, दोस्रो खेलमा कर्णाली याक्स र जनकपुर बोल्ट्सबीच प्रतिस्पर्धा हुनेछ । यी दुई टोलीबीचको खेल साँझ ५ बजे सुरु हुने तालिका छ । प्रतियोगिताका आगामी खेलसँगै टोलीहरू अंकतालिकामा आफ्नो स्थान बलियो बनाउने लक्ष्यमा मैदान उत्रनेछन् ।