एटीएन्डटीले बढायो वार्षिक नाफाको अनुमान, बन्डल सेवाबाट ग्राहक टिकाउने रणनीति

अमेरिकी दूरसञ्चार कम्पनी एटीएन्डटीले तेस्रो त्रैमासिकमा आम्दानी र नाफा बजारको अनुमानभन्दा बढी भएपछि सन् २०२६ को वार्षिक समायोजित नाफाको प्रक्षेपण बढाएको छ। कम्पनीले इन्टरनेट र मोबाइल सेवा एउटै प्याकेजमा उपलब्ध गराएर ग्राहक टिकाउने र प्रतिस्पर्धी कम्पनीतर्फ जाने क्रम घटाउने रणनीति अघि बढाएको छ। कम्पनीका अनुसार एटीएन्डटीको इन्टरनेट सेवा लिने घरपरिवारमध्ये करिब ४३ प्रतिशतले मोबाइल सेवा पनि लिने गरेका छन्। एउटै कम्पनीबाट दुवै सेवा लिने ग्राहक बढ्दा कम्पनीसँगको सम्बन्ध बलियो हुने र सेवा छाड्ने ग्राहकको संख्या घटाउन सहयोग पुग्ने अपेक्षा गरिएको छ। एटीएन्डटीले अब सन् २०२६ का लागि प्रतिशेयर समायोजित नाफा करिब २.४० अमेरिकी डलर हुने अनुमान गरेको छ। यसअघि कम्पनीले प्रतिशेयर २.२५ देखि २.३५ डलरसम्म नाफा हुने प्रक्षेपण गरेको थियो। रोयटर्सका अनुसार तेस्रो त्रैमासिकमा कम्पनीको आम्दानी अघिल्लो वर्षको सोही अवधिको तुलनामा ५.३ प्रतिशतले बढेर ३२ अर्ब ३० करोड डलर पुगेको छ। विश्लेषकहरूले ३१ अर्ब ६९ करोड डलर आम्दानी हुने अनुमान गरेका थिए। त्यस्तै, प्रतिशेयर समायोजित नाफा ६५ सेन्ट पुगेको छ, जुन विश्लेषकहरूको ६० सेन्टको अनुमानभन्दा बढी हो। यस अवधिमा कम्पनीले मासिक बिल तिर्ने ३ लाख ७९ हजार नयाँ मोबाइल ग्राहक थपेको छ। त्यस्तै, फाइबर इन्टरनेटका ४ लाख ४२ हजार र फिक्स्ड वायरलेस इन्टरनेटका ३ लाख २७ हजार नयाँ ग्राहक थपिएका छन्। एटीएन्डटीले उच्च गतिको इन्टरनेटको बढ्दो माग पूरा गर्न फाइबर नेटवर्क विस्तारमा लगानी बढाएको छ। गत महिना कम्पनीले फाइबर र केबल आपूर्तिका लागि कर्निङसँग ३ अर्ब डलरभन्दा बढीको बहुवर्षीय सम्झौता गरेको थियो। सन् २०२५ को मेमा कम्पनीले लुमेनको उपभोक्ता फाइबर व्यवसाय ५ अर्ब ७५ करोड डलरमा खरिद गर्ने सम्झौता पनि गरेको थियो। यसैबीच, मेक्सिकोको मोबाइल व्यवसाय २ अर्ब डलरमा बिक्री गर्ने योजनासँग सम्बन्धित गैरनगद खर्चका रूपमा कम्पनीले २ अर्ब ६० करोड डलर बराबरको सम्पत्ति मूल्य समायोजन खर्च जनाएको छ। आम्दानी र नाफाको नतिजा अपेक्षाभन्दा राम्रो आए पनि कम्पनीको सेयर मूल्य बजार खुल्नुअघिको कारोबारमा उतारचढावबीच ३.८ प्रतिशतले घटेको थियो। The post एटीएन्डटीले बढायो वार्षिक नाफाको अनुमान, बन्डल सेवाबाट ग्राहक टिकाउने रणनीति appeared first on Technology Khabar.