आरुघाटमा ९ दिनमै बन्यो बेलीब्रिज, बूढीगण्डकीमा फेरियो वारपारको अवस्था

गोरखा । बाढीले पक्की पुल बगाएपछि अवरुद्ध बनेको गोरखाको आरुघाटस्थित बूढीगण्डकी नदीको आवागमन पुनः सहज हुने भएको छ । नेपाली सेनाले बाढीले क्षति पु¥याएको पुलको विकल्पमा निर्माण गरेको बेलीब्रिज सोमबार सम्पन्न गरी सडक विभागलाई हस्तान्तरण गरेको छ । नेपाली सेना र सडक विभागको सहकार्यमा निर्माण गरिएको २७.४३ मिटर लामो पुल सञ्चालनमा आएसँगै नदी वारपार गर्न स्थानीयवासीलाई राहत मिलेको छ । पुलको अधिकतम भारवहन क्षमता २५ टन रहेको छ। यद्यपि, हाललाई पैदलयात्री र मोटरसाइकलका लागि मात्र आवागमन खुला गरिएको छ । ठूला सवारीसाधनको सञ्चालन भने सुरु भइसकेको छैन । गत असोज २५ गते बिहान बूढीगण्डकी नदीमा आएको आकस्मिक बाढीले आरुघाटस्थित पक्की पुल बगाएको थियो । पुल क्षतिग्रस्त भएपछि नदी वारपार गर्न स्थानीयवासीले समस्या भोग्दै आएका थिए । सडक सम्पर्क र दैनिक आवागमन प्रभावित भइरहेका बेला बेलीब्रिज निर्माणले तत्कालका लागि वैकल्पिक मार्ग उपलब्ध गराएको छ । असोज ३१ गतेबाट सुरु गरिएको निर्माणकार्य सोमबार सम्पन्न भएको हो। यसरी पक्की पुल बगाएको नौ दिनमै अस्थायी प्रकृतिको बेलीब्रिज तयार पारिएको छ । बेलीब्रिज सञ्चालनमा आए पनि सबै प्रकारका सवारीसाधनका लागि आवागमन खुलिसकेको छैन । त्यसैले पुल पूर्ण रूपमा सञ्चालनमा आउन र स्थानीयको आवागमन सहज बनाउन बाँकी व्यवस्थापन महत्वपूर्ण हुनेछ ।