म्यानचेस्टर युनाइटेडको बोर्डमाथि मार्टिनेज आक्रोस, खेलाडी भित्र्याउन पर्याप्त लगानी नगरेको गुनासो

काठमाडौं । म्यानचेस्टर युनाइटेडका डिफेन्डर लिसान्द्रो मार्टिनेजले क्लबको व्यवस्थापनमाथि खेलाडी भित्र्याउन पर्याप्त लगानी नगरेको आरोप लगाएका छन् । च्याम्पियन्स लिगअन्तर्गत मंगलबार एट्लेटिको मड्रिडसँग २–० ले पराजित भएपछि उनले क्लबको बोर्डप्रति असन्तुष्टि व्यक्त गरेका हुन् । युनाइटेड पछिल्ला पाँच खेलमा जितविहीन छ । क्लबले लिग सिजनको सुरुआत पनि पछिल्लो ४० वर्षयताकै खराब गरेको छ । एट्लेटिकोसँगको खेलपछि अमेजन प्राइमसँग कुरा गर्दै मार्टिनेजले टोलीको प्रदर्शनलाई ‘निकै कमजोर’ बताए । उनले मैदानमा देखिएको प्रदर्शन क्लबको वर्तमान अवस्थाको प्रतिबिम्ब भएको टिप्पणी गरे । ‘मैले आफूलाई धेरै नियन्त्रण गर्नुपर्छ । तर कहिलेकाहीँ मैदानमा देखिने प्रदर्शन हाम्रो क्लब अहिले कस्तो अवस्थामा छ भन्ने ऐना पनि हो,’ उनले भने । गत सिजन प्रिमियर लिगमा तेस्रो हुँदै च्याम्पियन्स लिगमा फर्किएको युनाइटेडले यसपटक खेलाडी भित्र्याउन थप लगानी गर्ने आफूले शतप्रतिशत अपेक्षा गरेको मार्टिनेजले बताए । ‘म हाम्रा प्राविधिक निर्देशक जेसन विल्कक्सबाट अझ बढी अपेक्षा गर्छु । इमानदारीपूर्वक भन्नुपर्दा, खेलाडीका रूपमा हामीले पनि अझ राम्रो गर्नुपर्छ । तर यस्ता ठूला खेलका लागि बलियो टोली तयार पार्नु पनि उत्तिकै महत्त्वपूर्ण हुन्छ,’ उनले भने । गत सिजन क्लबले उत्कृष्ट टोली निर्माण गर्ने आधार तयार गरेको तर त्यसलाई निरन्तरता दिन व्यवस्थापन असफल भएको उनले टिप्पणी गरे । लगातार पाँच खेलमा जित निकाल्न नसकेपछि प्रशिक्षक माइकल क्यारिकमाथि दबाब बढिरहेको छ । तर मार्टिनेजले प्रशिक्षक परिवर्तन गर्दैमा समस्या समाधान नहुने संकेत गरे ।‘प्रशिक्षकलाई बारम्बार परिवर्तन गरिरहन सकिँदैन । अरू क्षेत्रको अवस्था के छ तरु म यसबारे थप भन्न सक्दिनँ,’ उनले भने । उनले एट्लेटिकोसँगको हारपछि प्रशिक्षक वा खेलाडीलाई मात्रै दोष दिनु सजिलो भए पनि क्लबका अन्य पक्षको कमजोरी पनि हेर्नुपर्ने बताए । गत सिजन च्याम्पियन्स लिगको सेमिफाइनलसम्म पुगेको एट्लेटिकोसँगको खेल हेर्न युनाइटेडका सेयरधनी जिम र्याटक्लिफ पनि रंगशालामा उपस्थित थिए । युनाइटेडले यसै समरमा मिडफिल्डर कार्लोस बालेबा, युरी टिलेमान्स र आन्द्री सान्तोसलाई भित्र्याउन करिब १४ करोड पाउन्ड (१८ करोड ५० लाख अमेरिकी डलर) खर्च गरेको थियो । तर, लेफ्टब्याक र स्ट्राइकरजस्ता अन्य महत्त्वपूर्ण स्थानमा खेलाडी नथपेको भन्दै समर्थक असन्तुष्ट छन् । खेलपछि पत्रकारसँग कुरा गर्दै प्रशिक्षक क्यारिकले मार्टिनेजको टिप्पणी आफूले नसुनेको र त्यसबारे तत्काल प्रतिक्रिया दिन नसक्ने बताए ।‘खेलको निराशाले पनि उनले त्यस्तो बोलेको हुन सक्छ । यहाँ आएर खेलबाट केही हासिल गर्न नसक्दा निराश हुनु स्वाभाविक हो,’ क्यारिकले भने । यता, म्यानचेस्टर युनाइटेड र इंग्ल्यान्डका पूर्वस्ट्राइकर वायन रुनीले भने मार्टिनेजले आफ्नो आलोचनाको सीमा नाघेको टिप्पणी गरेका छन् ।‘मलाई लाग्छ, उनले अलि बढी नै बोले । यस्तो कुरा क्लबभित्रै राख्नुपर्थ्यो,’ रुनीले अमेजन प्राइमसँग भने । मार्टिनेजले क्लबप्रति माया देखाएको र थप खेलाडी भित्र्याउन लगानी होस् भन्ने चाहेको स्पष्ट रहेको बताउँदै रुनीले यस्तो अभिव्यक्तिका कारण उनी आफैँ क्लबबाट बाहिरिन सक्ने सम्भावनासमेत औँल्याए ।