आईसीसी क्रिकेट विश्वकप लिग–२ : जित्नै पर्ने दबाबबीच नेपाल र क्यानडा भिड्दै

काठमाडौं । नेपालले आईसीसी क्रिकेट विश्वकप लिग–२ अन्तर्गत त्रिकोणात्मक एकदिवसीय शृंखलामा आज क्यानडाको सामना गर्दै छ । ओमानको अल अमिरेत रंगशालामा नेपाली समयअनुासर बिहान ११ः१५ मा सुरु हुने खेल आफ्नो पक्षमा पार्दै नेपाल शीर्ष ६ मा स्थान पक्का गर्ने लक्ष्यमा छ । यो खेल गुमाए नेपाललाई सोमबार हुने ओमनविरुद्धको खेल जित्नै पर्ने दबाब सिर्जना हुनेछ । नेपालले लगातार तेस्रो जितको खोजीमा छ । यसअघि टोलीले क्यानडा र ओमानलाई पराजित गरेको थियो । यता, क्यानडा पनि जित निकाल्दै शीर्ष ६ को सम्भावना जिवितै राख्न चाहन्छ । क्यानडाको लिग–२ मा यो अन्तिम खेल हो । क्यानडाले पछिल्लो खेलमा ओमानलाई हराएको थियो । त्यसअघि भने टोली ओमान र नेपालसँग पराजित भएको थियो । रोहिककुमार पौडेलले लय समात्नु नेपालका लागि सुखद पक्ष हो । उनले दुई खेलमा गरी १६२ रन प्रहार गरिसकेका छन् । रोहितलाई गुल्शनकुमार झा, इशान पाण्डे, बसिर अहमदजस्ता खेलाडीको साथ रहनेछ । यसैगरी, बलिङमा नन्दन यादव र कप्तान सन्दीप लामिछाने निर्णायक बन्न सक्छन् । जारी शृंखलामा दुवैले पाँच–पाँच विकेट लिएका छन् । बलिङमा करण केसी, ललितनारायण राजवंशीजस्ता खेलाडीको पनि महत्त्वपूर्ण भूमिका रहनेछ । नेपालले बसिर, गुल्शनकुमार झा, रोहितलाई पनि बलिङमा प्रयोग गर्न सक्छ । दीपेन्द्रसिंह ऐरी अलराउन्डको भूमिकामा रहनेछन् । आदित्य वर्दराजन, समीत गोहेलजस्ता खेलाडी नेपाली बलरका लागि घातक बन्न सक्छन् । यो शृंखलामा वर्दराजनले ११९ र गोहेलले १०० रन प्रहार गरेका छन् । यसैगरी, बलिङमा हर्ष थाकरको भूमिका महत्त्वपूर्ण रहनेछ । उनले पाँच विकेट लिएका छन् । कलिम साना, जाहिद शिर्जादजस्ता बलर पनि नेपाली ब्याटरका लागि समस्य बन्न सक्छन् । एकदिवसीय अन्तर्राष्ट्रियमा हालसम्म यी दुई बीच ६ एकदिवसीय अन्तर्राष्ट्रिय खेल भएका छन् । जसमा नेपालले चार र क्यानडाले दुई खेल आफ्नो पक्षमा पारेका छन् ।आईसीसी लिग–२ अन्तर्गतको पछिल्लो भेटमा भने नेपाल २४ रनले विजयी भएको थियो ।