कांग्रेस नेताहरू भन्छन्- ‘नयाँ नेतृत्वले पार्टीलाई एकढिक्का बनाएर लैजानुपर्छ’

नेपाली कांग्रेसका नेताहरूले पार्टीको १५औँ महाधिवेशनबाट निर्वाचित नयाँ कार्यसमितिले पार्टीलाई एकताबद्ध बनाउँदै नयाँ सोच, नीति र कार्यशैलीका साथ अघि बढाउनुपर्नेमा जोड दिएका छन् । महाधिवेशनपछि नेतृत्व परिवर्तनसँगै पार्टीको नीतिगत तथा सांगठनिक रूपान्तरणको अपेक्षा बढेको उल्लेख गर्दै उनीहरूले युवा पुस्ताको भावना, जनसरोकारका मुद्दा र बदलिँदो राजनीतिक परिस्थितिलाई सम्बोधन गर्नुपर्ने बताएका हुन् । कांग्रेस केन्द्रीय सदस्य खड्गबहादुर शाहीले कांग्रेसप्रति जनताको आशा र भरोसा कायम रहेको उल्लेख गर्दै वर्तमान राष्ट्रिय परिस्थितिमा पार्टी एकताबद्ध भएर अघि बढ्नुपर्ने बताए । नयाँ नेतृत्वले युवा पुस्ताको भावना, राजनीतिक चेतना र उनीहरूले उठाउँदै आएका प्रश्नलाई सम्बोधन गर्नुपर्ने उनको भनाइ छ । पार्टीको विधान, नीति र कार्यदिशामा आवश्यक परिवर्तन गर्दै देश र जनताको आवश्यकताअनुसार शासन सञ्चालन गर्ने सोचका साथ अघि बढ्नुपर्ने शाहीले बताए । साथै, कांग्रेसले सरकारलाई जनताप्रति उत्तरदायी बनाउन प्रभावकारी प्रतिपक्षको भूमिका निर्वाह गर्नुपर्नेमा उनले जोड दिए । चाडपर्वका बेला हवाई तथा सडक यातायातको भाडा र दैनिक उपभोग्य वस्तुको मूल्य बढ्दा सर्वसाधारण समस्यामा परेको उल्लेख गर्दै शाहीले महँगी नियन्त्रण गर्न सरकार गम्भीर हुनुपर्ने बताए । ‘नेपाली कांग्रेस एउटा नयाँ ढङ्गले, नयाँ विचार र नयाँ सोचका साथ अगाडि बढ्नुपर्छ । देश र जनतालाई सुहाउँदो शासन व्यवस्था सञ्चालन गरेर अघि बढ्नुपर्छ,’ उनले भने । सरकारले जनताका समस्या बेवास्ता गरे कांग्रेसले सडकदेखि सदनसम्म आवाज उठाउने बताउँदै शाहीले महँगी नियन्त्रण गरी नागरिकलाई राहत दिनुपर्नेमा जोड दिए । यसैगरी, कांग्रेस केन्द्रीय सदस्य मिर्शाद अन्सारीले युवाहरूको भावना र अपेक्षालाई पार्टीको नीति तथा कार्यक्रममा समेट्नुपर्ने बताए । गत भदौ २३ र २४ गतेको आन्दोलनपछि मुलुकको राजनीतिक परिस्थितिमा आएको परिवर्तनलाई कांग्रेसले गम्भीरतापूर्वक लिनुपर्ने उनको भनाइ छ । मधेसका मुस्लिम समुदायलगायत विभिन्न समुदायका समस्या पहिचान गरी समाधानका लागि पहल गर्नुपर्ने उल्लेख गर्दै अन्सारीले पार्टीलाई गाउँगाउँसम्म सशक्त संगठनका रूपमा विस्तार गर्नुपर्ने बताए । ‘मधेसमा मुस्लिम समुदायका विभिन्न मुद्दाहरू छन् । ती मुद्दालाई उठान गरेर कार्यान्वयनतर्फ लैजानुपर्छ । युवाहरूमा राजनीतिप्रति वितृष्णा बढेको देखिन्छ, यसलाई सम्बोधन गर्नुपर्छ,’ उनले भने, ‘युवाहरूको मनोभावना र उनीहरूको सोच्ने दृष्टिकोणलाई आत्मसात् गरेर हामी अगाडि बढ्छौँ ।’ कांग्रेस नेता लेखनाथ पोखरेलले नयाँ नेतृत्वले सरकारका सकारात्मक काममा रचनात्मक सहयोग गर्ने र गलत कामको आलोचना गर्ने गरी जिम्मेवार प्रतिपक्षको भूमिका निर्वाह गर्नुपर्ने बताए । आगामी स्थानीय तथा प्रदेश निर्वाचनलाई लक्षित गर्दै पार्टीले राजनीतिक तथा निर्वाचनसम्बन्धी संयन्त्र निर्माण गर्नुपर्नेमा पनि उनले जोड दिए । पार्टीभित्रका गुट–उपगुटभन्दा माथि उठेर एकताबद्ध रूपमा अघि बढ्नुपर्ने उल्लेख गर्दै पोखरेलले संगठन सुदृढीकरणलाई प्राथमिकतामा राख्नुपर्ने बताए । पाल्पा कांग्रेसका जिल्ला सभापति हिमालदत्त श्रेष्ठले जनसरोकारका मुद्दालाई पार्टीको नीति तथा कार्यक्रमको केन्द्रमा राख्नुपर्ने बताए । जलवायु परिवर्तनलगायतका विषयलाई प्राथमिकता दिँदै जनताका दैनिक समस्या सम्बोधन गर्ने कार्यक्रम अघि बढाउनुपर्ने उनको भनाइ छ । आगामी स्थानीय तथा प्रदेश निर्वाचनमा कांग्रेसलाई लोकप्रिय र ठूलो राजनीतिक शक्तिका रूपमा स्थापित गर्न नयाँ नेतृत्वले प्रभावकारी काम गर्नुपर्नेमा श्रेष्ठले जोड दिए । कांग्रेस नेतृ सरस्वती अर्याल तिवारीले आगामी स्थानीय निर्वाचनअघि पार्टीभित्रका असन्तुष्टि सम्बोधन गर्दै फरक धारमा रहेका नेताहरूलाई समेत समेटेर पार्टीलाई एकताबद्ध बनाउनुपर्ने बताइन् । देशभर एउटै उद्देश्य र साझा सन्देशका साथ पार्टी परिचालन गर्नु अहिलेको आवश्यकता रहेको उनको भनाइ छ । त्यस्तै, कांग्रेस नेतृ सनम विकले नयाँ र पुरानो पुस्ताबीच सहकार्य गर्दै पार्टीलाई अघि बढाउनुपर्ने बताइन् । आन्तरिक प्रतिस्पर्धामा अल्झिनुभन्दा अन्य राजनीतिक दलसँग प्रतिस्पर्धा गर्न संगठन बलियो बनाउनुपर्नेमा उनले जोड दिइन् । कांग्रेसका युवा नेता समुन्द्र पोखरेलले वडा तहदेखि नै युवाहरूलाई नेतृत्वमा आउने अवसर दिनु सकारात्मक भएको बताए । उनले युवा रोजगारी र युवासँग सम्बन्धित सरोकारका विषयलाई पार्टीले प्राथमिकताका साथ उठाउनुपर्ने धारणा राखे । नेताहरूले पार्टीको नयाँ नेतृत्वले आन्तरिक एकता कायम गर्दै नीतिगत स्पष्टता, संगठन विस्तार, युवा सहभागिता र जनसरोकारका मुद्दालाई प्राथमिकतामा राख्नुपर्ने बताएका छन् । नेपाली कांग्रेसको १५औँ महाधिवेशनबाट गगनकुमार थापा सभापतिमा निर्वाचित भएका छन् । नयाँ नेतृत्व चयनका लागि भएको निर्वाचनको मतगणना पार्टी कार्यालयमा जारी रहेको र अधिकांश पदाधिकारीको मतपरिणाम सार्वजनिक भइसकेको विवरण प्राप्त भएको छ । समावेशी समूहका केही सहमहामन्त्री तथा विभिन्न क्लस्टर र खुलातर्फका केन्द्रीय सदस्यको अन्तिम नतिजा आउन बाँकी रहेको जनाइएको छ ।