भोटेकोशी बाढी प्रभावित डेरी व्यवसायीलाई डेरी एसोसिएसन बागमती प्रदेशको राहत

ललितपुर । नेपाल डेरी एसोसिएसन बागमती प्रदेश कार्यसमितिले भोटेकोशी बाढीबाट प्रभावित डेरी व्यवसायी तथा एसोसिएसनका सदस्यहरूलाई राहत हस्तान्तरण गरेको छ । नेपालीहरूको महान् पर्व विजया दशमी, तिहार, नेपाल संवत् ११४७ तथा छठ पर्वको अवसरमा शुभकामना आदानप्रदानसँगै राहत हस्तान्तरण कार्यक्रम–२०८३ आयोजना गरी प्रभावित सदस्यहरूलाई सहयोग गरिएको हो । नेपाल डेरी एसोसिएसन बागमती प्रदेशका अध्यक्ष टीका प्रसाद घिमिरेको अध्यक्षतामा सम्पन्न कार्यक्रममा नेपाल उद्योग वाणिज्य महासंघका निवर्तमान उपाध्यक्ष हेमराज ढकाल प्रमुख अतिथि तथा नेपाल डेरी एसोसिएसनका केन्द्रीय अध्यक्ष प्रल्हाद दाहाल विशेष अतिथिका रूपमा सहभागी हुनुहुन्थ्यो । कार्यक्रम एसोसिएसनको केन्द्रीय कार्यालय शंखमूल, ललितपुरमा आयोजना गरिएको थियो । कार्यक्रममा एसोसिएसनका संस्थापक एवं सल्लाहकार राजन दाहाल, बोर्ड सदस्य रामभक्त दाहाल, वरिष्ठ उपाध्यक्ष दीपप्रसाद धमला, उपाध्यक्ष मनोज प्रसाद घिमिरे, सहसचिव रमेश सञ्जेल, नेपाल कृषि तथा पशुपन्छी व्यवसायी संघका महासचिव श्रीकृष्ण भण्डारी, नेपाल डेरी एसोसिएसन नुवाकोटका अध्यक्ष बालकृष्ण ढुङ्गानालगायत विभिन्न पदाधिकारी, सदस्य तथा अतिथिहरूको उपस्थिति थियो । गत भदौ १० गते भोटेकोशी नदीमा आएको बाढीबाट प्रभावित डेरी व्यवसायी तथा एसोसिएसनका सदस्यहरूलाई सहयोग पुर्‍याउने उद्देश्यले राहत हस्तान्तरण गरिएको आयोजकले जनाएको छ । कार्यक्रममा नुवाकोटका त्रिशुल डेरी प्रालि, न्यू स्टार नुवाकोट डेरी सप्लायर्स, भुवनेश्वरी डेरी सप्लायर्स तथा त्रिशुली दूध सङ्कलन तथा बिक्री केन्द्रसँग आबद्ध प्रभावित सदस्यहरूलाई राहत प्रदान गरिएको थियो । राहत सङ्कलन तथा व्यवस्थापनमा नेपाल डेरी एसोसिएसन बागमती प्रदेशको अगुवाइमा एसोसिएसनका पदाधिकारी, सदस्य तथा आबद्ध डेरी उद्योगी व्यवसायीहरूले सहयोग गरेका थिए । एसोसिएसनका केन्द्रीय अध्यक्ष प्रल्हाद दाहालले विपद्का बेला आफ्ना सदस्यहरूलाई साथ दिनु, उनीहरूको आर्थिक तथा सामाजिक हितमा सहकार्य गर्नु र आपसी सहयोगको भावना बलियो बनाउनु कार्यक्रमको मुख्य उद्देश्य रहेको बताउनुभयो । बागमती प्रदेशका उपाध्यक्ष ध्रुव तिवारीले स्वागत मन्तव्यका क्रममा कार्यक्रमले चाडपर्वको खुसी साटासाट गर्नुका साथै विपद्मा परेका व्यवसायी तथा सदस्यहरूको दुःखमा साथ दिनुपर्ने मानवीय भावना र सामाजिक उत्तरदायित्वको सन्देश दिएको बताउनुभयो । एसोसिएसनका सल्लाहकार राजन दाहालले सदस्यहरूलाई अप्ठ्यारो परेको समयमा संस्थाले सधैँ सहयोग गर्दै आएको उल्लेख गर्नुभयो । कार्यक्रमका प्रमुख अतिथि हेमराज ढकालले नेपाल डेरी एसोसिएसन सक्रिय र सदस्यहरूको हितमा काम गर्ने संस्था रहेको बताउनुभयो । विपद्का बेला सदस्यहरू एकजुट भएर प्रभावित व्यवसायीलाई सहयोग गर्नु प्रशंसनीय रहेको उल्लेख गर्दै उहाँले यसबाट आफू खुसी भएको बताउनुभयो । उहाँले नेपाल डेरी एसोसिएसनले नेपाल उद्योग वाणिज्य महासंघसँग सहकार्य गर्दै आएको स्मरणसमेत गर्नुभयो । कार्यक्रमको समापन गर्दै बागमती प्रदेश अध्यक्ष टीका प्रसाद घिमिरेले विजया दशमी, तिहार, नेपाल संवत् ११४७ तथा छठ पर्वको अवसरमा सम्पूर्ण नेपाली दाजुभाइ तथा दिदीबहिनीहरूमा सुख, शान्ति, समृद्धि र उत्तरोत्तर प्रगतिको शुभकामना व्यक्त गर्नुभयो ।