नेपाली सम्पदा र आधुनिक फेशनको संगम ‘अनन्तरूपवितानम्’

काठमाडौं । नमुना कलेज अफ फेशन टेक्नोलोजी (एनसीएफटी)ले आफ्नो २१औं स्नातक फेशन शो ‘अनन्तरूपवितानम्’ पुल्चोकस्थित द प्लाजामा आयोजना गरेको छ । नेपाली पुर्ख्यौली शिल्प, सांस्कृतिक विविधता, आध्यात्मिक चेतना र भविष्यवादी कल्पनालाई समकालीन फेशनसँग जोड्दै आयोजित शोमा ५४ स्नातक डिजाइनरका सिर्जना प्रस्तुत गरिएका थिए । कार्यक्रममा छवटा फेशन संग्रह र छवटा सिर्जनात्मक उत्कृष्ट कृतिमार्फत नेपाली सम्पदा, प्रकृति, दिगोपन र प्रविधिलाई पहिरनमा उतारिएको थियो । मन्दिरका काष्ठकला, पौभा चित्रकला, परम्परागत आभूषण, कृषि संस्कृति, हिमाली जीवनशैली, देवीशक्ति तथा कृत्रिम बुद्धिमत्ताबाट प्रेरित डिजाइन शोका मुख्य आकर्षण थिए । विभिन्न संग्रहले परम्परागत कलालाई आधुनिक कुट्युरमा रूपान्तरण गर्नुका साथै कृषि र वातावरणीय उत्तरदायित्व, जातीय पहिचान, हिमाली जीवन तथा नारीशक्तिलाई फेशनमार्फत प्रस्तुत गरेका थिए । अन्तिम संग्रहमा नेपाली सांस्कृतिक पहिचान र आध्यात्मिक प्रतीकलाई कृत्रिम बुद्धिमत्ताबाट प्रेरित भविष्यवादी डिजाइनसँग जोडिएको थियो । अन्तर्राष्ट्रिय फेशन कोरियोग्राफर तथा सञ्चारकर्मी रोजिन शाक्यले कोरियोग्राफी गरेको कार्यक्रमको समन्वय श्रीतिका शाक्य, सुबिना राउत, अलिश रञ्जित र स्वस्तिका भारीले गर्नुभएको थियो । विद्यार्थीका सिर्जनाको मूल्यांकन प्राविधिक शिक्षा, फेशन डिजाइन, वस्त्र प्रविधि तथा तयारी पोसाक उद्योगका विज्ञ सम्मिलित निर्णायक मण्डलले गरेको थियो । कार्यक्रममा एनसीएफटी फेशन क्याटलगको पाँचौं संस्करणसमेत विमोचन गरिएको थियो । क्याटलगमा विद्यार्थीका डिजाइन, अनुसन्धान, अवधारणा र प्राविधिक प्रक्रियालाई अभिलेखित गरिएको छ । गार्मेन्ट एसोसिएसन-नेपाल (जीएएन) र अन्तर्राष्ट्रिय श्रम संगठन (आईएलओ) सँगको सहकार्यमा कार्यक्रम आयोजना गरिएको थियो । एनसीएफटीका अनुसार ‘अनन्तरूपवितानम्’ नेपाली सम्पदालाई आधुनिक डिजाइन, दिगोपन र प्रविधिसँग जोड्ने प्रयास हो । कार्यक्रमले परम्परागत ज्ञान र आधुनिक नवप्रवर्तनलाई एकीकृत गर्दै नेपाली फेशनलाई व्यावसायिक तथा अन्तर्राष्ट्रिय क्षेत्रमा अघि बढाउने सम्भावना प्रस्तुत गरेको छ ।