मिसाइल आक्रमणको खतरापछि रोनाल्डोको खेल प्रभावित

रियाद । साउदी अरबको राजधानी रियादमा मिसाइल आक्रमणको खतरा देखिएपछि पोर्चुगलका स्टार फुटबलर क्रिस्टियानो रोनाल्डोको टोली अल नासर र उज्वेकिस्तानको नफ्तची फरगानाबीचको एसियन च्याम्पियन्स लिगको खेल प्रभावित भएको छ । अल-अब्बल पार्कमा हुने निर्धारित खेलअघि रियादमा विस्फोटका आवाज सुनिएपछि खेल एक घण्टा ढिला भएको हो । सुरक्षा सतर्कताका कारण खेल सुरु हुने समय सारिएको थियो । यद्यपि, खेल सम्पन्न हुँदा अल नासरले नफ्तची फरगानालाई ३-१ गोलले पराजित गर्‍यो । साउदी नेतृत्वको सैन्य गठबन्धनले रियादतर्फ प्रहार गरिएको हुथी विद्रोहीको ब्यालिस्टिक क्षेप्यास्त्रलाई बीचमै रोकेर नष्ट गरेको जनाएको छ । उक्त घटनापछि रंगशालामा उपस्थित दर्शकलाई आ-आफ्नो सिटमा बसिरहन आग्रह गरिएको थियो । स्थानीय समयअनुसार राती ९ बजेर १५ मिनेटमा सुरु हुने तालिका थियो । निर्धारित समयभन्दा एक घण्टा ढिला खेल सुरु भएको थियो । समाचार संस्था एएफपीअनुसार खेल सुरु हुनुभन्दा केही समयअघि रियादमा विस्फोटका आवाज सुनेका थिए । त्यसै समयमा शहरका बासिन्दाको मोबाइल फोनमा हवाई आक्रमणको चेतावनीसहितको सन्देश आएको थियो । उक्त सन्देशमा सम्बन्धित क्षेत्र हवाई आक्रमणको जोखिममा रहेको भन्दै शान्त रहन, घर वा सुरक्षित स्थानमा बस्न तथा झ्याल र ढोकाबाट टाढा रहन आग्रह गरिएको थियो । साथै, नागरिक सुरक्षा निकायका निर्देशन पालना गर्न भनिएको थियो । रंगशालाका उद्घोषकले अवस्था सुरक्षित रहेको र खेल सञ्चालन हुने जानकारी दिँदै दर्शकलाई आफ्नो सिटमा बसिरहन आग्रह गरेका थिए । तर, खेलको प्रत्यक्ष प्रसारण गरिरहेको टेलिभिजन च्यानलले खेल एक घण्टा ढिला सुरु हुने जानकारी दिएको थियो । त्यसपछि सैन्य गठबन्धनले सामाजिक सञ्जाल एक्समार्फत् जारी गरेको वक्तव्यमा हुथी विद्रोहीले रियादतर्फ प्रहार गरेको ब्यालिस्टिक क्षेप्यास्त्रलाई रोकेर नष्ट गरिएको उल्लेख गरेको थियो । रियाद विमानस्थललाई लक्षित गरी पनि घातक आक्रमणका घटना भएको विवरण सार्वजनिक भएको छ । सुरक्षा सतर्कताबीच सुरु भएको खेलमा रोनाल्डोले पहिलो हाफ सकिनुभन्दा ठीकअघि गोल गर्नुभयो । यो उहाँको व्यावसायिक फुटबल करिअरको ९८१औँ गोल थियो । अब एक हजार गोलको आँकडा छुन उहाँलाई १९ गोल आवश्यक छ । रोनाल्डोको गोलसँगै अल नासरले खेलमा आफ्नो प्रभाव कायम राख्यो । अन्ततः टोलीले नफ्तची फरगानालाई ३-१ गोलले पराजित गर्दै जित हात पार्‍यो । ४१ वर्षीय रोनाल्डो साउदी क्लब अल नासरबाट व्यावसायिक फुटबल खेलिरहनुभएको छ । उहाँको व्यक्तिगत प्रदर्शनसँगै टोलीको जितको चर्चा भइरहेका बेला रियादमा देखिएको सुरक्षा जोखिमले पनि खेललाई प्रभावित पारेको थियो । यसैबीच, पोर्चुगल फुटबल महासंघले राष्ट्रिय टोलीको शिविर छाडेको घटनामा रोनाल्डोलाई तीन खेलका लागि निलम्बन गरेको छ । महासंघले उहाँविरुद्ध अनुशासनात्मक अनुसन्धानसमेत अघि बढाएको छ । महासंघले शनिबार जारी गरेको वक्तव्यअनुसार यो विषय अनुशासनात्मक अनुसन्धान समितिमा पठाइएको छ । अनुसन्धान पूरा नभएसम्म समितिको निष्कर्ष गोप्य राखिने महासंघले जनाएको छ । रोनाल्डोले अन्तर्राष्ट्रिय खेलका लागि निर्धारित समयावधिमा पोर्चुगलको राष्ट्रिय टोलीको शिविर छोड्नुभएको थियो । नयाँ प्रशिक्षक जर्ज जिसुससँग खेल्ने समयलाई लिएर विवाद भएपछि उहाँले शिविर छाडेको विवरण सार्वजनिक भएको थियो । एजेन्सी