नेपालको पहिचान र राष्ट्रिय अस्तित्व संकटमा छ : देव गुरुङ

नेपाली कम्युनिस्ट पार्टीका नेता देव गुरुङले नवउदारवादी आर्थिक प्रणालीका कारण नेपालको मौलिक पहिचान, राष्ट्रिय अस्मिता र स्वाधीनता संकटमा परेको बताएका छन् । मंगलबार काठमाडौंमा आयोजित कार्यक्रममा बोल्दै गुरुङले नेपालको भाषा, संस्कृति, सभ्यता र अर्थतन्त्र कमजोर हुँदै गएको दाबी गरे । राष्ट्रिय पहिचान र स्वाधीनताको रक्षा गर्न समाजवादी आन्दोलनको तयारी गर्नुपर्नेमा उनले जोड दिए । गुरुङले नेपालको वर्तमान अवस्थालाई ‘नवऔपनिवेशिकता’सँग जोड्दै विश्वव्यापी रूपमा पश्चिमा एकध्रुवीय साम्राज्यवादी प्रभुत्व विस्तार भइरहेको टिप्पणी गरे । प्रतिक्रान्तिको प्रतिरोध गर्न नसके नेपालको राष्ट्रिय अस्तित्व नै संकटमा पर्ने उनको भनाइ थियो । ‘नवउदारवादी प्रणालीले नेपालको आफ्नो पहिचान, आफ्नो भाषा, आफ्नो अर्थतन्त्र, आफ्नो राष्ट्रियता, आफ्नो सभ्यता र संस्कृति सबै हराउँदै लग्यो,’ उनले भने, ‘राष्ट्रिय स्वाधीनतासहितको समाजवादी आन्दोलनको तयारी नगर्ने हो भने नेपालको अस्मिता र पहिचान समाप्त हुने खतरा छ ।’ उनले राष्ट्रिय स्वाधीनताको मुद्दामा सम्पूर्ण कम्युनिस्ट, देशभक्त, लोकतन्त्रप्रेमी शक्ति र नेपाली जनतालाई एकजुट हुन आह्वान गरे । राष्ट्रिय पहिचान र अस्तित्वको रक्षाका लागि बृहत्तर ‘राष्ट्र बचाउ अभियान’ सञ्चालन गर्नुपर्ने उनको भनाइ थियो । गुरुङले वित्तीय एकाधिकार पुँजीवाद र त्यसका सहयोगी शक्तिको प्रभावलाई चुनौती दिन राष्ट्रिय स्तरमा साझा राजनीतिक समझदारी आवश्यक रहेको बताए । आन्तरिक राजनीतिक शक्तिबीचको द्वन्द्व र विभाजनले बाह्य शक्तिको प्रभाव विस्तार हुने जोखिमसमेत उनले औंल्याए । दलित, महिला, जनजाति, मुस्लिम र मधेसीलगायत उत्पीडित समुदायका पहिचानका मुद्दालाई राष्ट्रिय मुक्ति आन्दोलनसँग जोडेर अघि बढाउनुपर्नेमा पनि उनले जोड दिए । पहिचानका आन्दोलनलाई एकअर्काविरुद्ध उभ्याउँदा समग्र आन्दोलन कमजोर हुने उनको तर्क थियो । राष्ट्रिय अस्मिताको रक्षाका लागि सबै राजनीतिक शक्ति र समुदायबीच एकता आवश्यक रहेको उल्लेख गर्दै गुरुङले साझा अभियानमार्फत नेपालको स्वाधीनता र मौलिक पहिचान जोगाउनुपर्ने बताए ।