माओवादी आन्दोलनको आवश्यकता अझै छ, नयाँ पुस्ताले पुनर्गठन गर्नुपर्छ : जनार्दन शर्मा

प्रगतिशील लोकतान्त्रिक पार्टीका नेता जनार्दन शर्माले माओवादी आन्दोलनको पुनर्गठन र पुनर्जागरणका लागि नयाँ पुस्ताले नेतृत्व लिनुपर्ने बताएका छन् । मंगलबार काठमाडौंमा आयोजित कार्यक्रममा बोल्दै शर्माले जनयुद्धको नेतृत्व गरेको पुरानो पुस्ताले अब माओवादी आन्दोलनलाई प्रभावकारी रूपमा अघि बढाउन नसक्ने टिप्पणी गरे । आन्दोलनका बाँकी एजेन्डालाई नयाँ पुस्ताले अघि बढाउनुपर्ने उनको भनाइ थियो । शर्माले माओवादी आन्दोलनले समयअनुसार विचार विकास गर्न र जनताका समस्या समाधान गर्ने दिशामा आफूलाई अघि बढाउन नसक्दा प्रतिक्रान्तिको अवस्था सिर्जना भएको बताए । बन्दुकको लडाइँ मात्रै क्रान्ति नभएको उल्लेख गर्दै उनले संविधानसभा, शान्ति प्रक्रिया र जनताका समस्या समाधान गर्ने संघर्ष पनि क्रान्तिकै निरन्तरता भएको बताए । ‘अब फेरि एकपटक नयाँ सिराबाट, नयाँ ढंगले राजनीतिक सुझबुझ भएको नयाँ पुस्ताले माओवादी आन्दोलनलाई पुनर्गठन गर्नुपर्छ । यसको पुनर्जागरण गर्नुपर्छ,’ उनले भने, ‘माओवादी आन्दोलनका एजेन्डा अहिले पनि बाँकी छन् । त्यसलाई पुनर्गठित गर्नुपर्छ । त्यसमा मैले आफ्नो तर्फबाट सहयोग र योगदान गर्न तयार छु, तर मेरो सर्त के छ भने नयाँ पुस्ताले आएर यसको नेतृत्व गर्नुपर्छ ।’ उनले माओवादी आन्दोलनका क्रममा स्थापित भएका अधिकार संविधानमा समावेश भए पनि तिनको प्रभावकारी कार्यान्वयन हुन नसकेको बताए । समानुपातिक प्रतिनिधित्व र समानताको अधिकार कार्यान्वयनमा देखिएका विकृतिप्रति चिन्ता व्यक्त गर्दै उनले प्राप्त उपलब्धिको संरक्षण गर्न नयाँ राजनीतिक पहल आवश्यक रहेको उल्लेख गरे । शर्माले पछिल्लो राजनीतिक परिस्थितिमा संविधान, लोकतन्त्र, समावेशिता र राष्ट्रियतामाथि चुनौती थपिएको टिप्पणी गरे । प्राप्त उपलब्धि नै संकटमा पर्न सक्ने अवस्था रहेकाले सबैले गम्भीर भएर सोच्नुपर्ने उनको भनाइ थियो । उनले पुस्तान्तरणलाई उमेरसँग मात्रै जोड्न नहुने स्पष्ट पार्दै नेतृत्वको क्षमता र योग्यतालाई मुख्य आधार बनाउनुपर्ने बताए । ‘पुस्ताको कुरा गर्दा को कति वर्षको भन्ने होइन, सक्षम र असक्षमको कुरा हो,’ उनले भने, ‘हिजो जनयुद्ध लडेर त्यसको नेतृत्व गरेको टिम अब असक्षम भइसक्यो । हामीभन्दा पछिल्लो पुस्ताले आन्दोलनको पुनर्गठन गर्नुपर्छ ।’ माओवादी आन्दोलनका एजेन्डा अझै सान्दर्भिक रहेको दाबी गर्दै शर्माले नयाँ पुस्ताले नेतृत्व लिएर आन्दोलनलाई पुनर्गठन र पुनर्जागरणको दिशामा अघि बढाए आफू सहयोग गर्न तयार रहेको बताए ।