इरानको निर्देशनमा एयरबेसमा आक्रमणको षड्यन्त्र भएको बेलायतको दाबी

काठमाडौं । बेलायती प्रधानमन्त्री एन्डी बर्नहमले इङ्ल्यान्डस्थित अमेरिकी सेनाले प्रयोग गर्ने रोयल एयर फोर्स (आरएएफ) फेयरफोर्ड एयरबेसमा इरानले आक्रमणको षड्यन्त्र गरेको बताएका छन् । उनले इरानको इस्लामिक रिभोलुसनरी गार्डको निर्देशनमा आक्रमणको षड्यन्त्र रचिएको बताएका छन् । सोमबार सांसदहरूलाई सम्बोधन गर्दै उनले षड्यन्त्रका लागि निर्देशन इरानबाटै आएको लगभग निश्चित रहेको दाबी गरे । उनले बेलायतले आफ्नो भूमिमा यस्ता खतरा सहन नगर्ने पनि बताएका छन् । यसअघि पनि बर्नहमले गत महिना सार्वजनिक भएको आक्रमण योजनामा इरानको संलग्नताको बलियो संकेत रहेको बताएका थिए । पश्चिम एसियामा जारी युद्धका क्रममा इरानमाथि आक्रमण गर्न अमेरिकी बमवर्षक विमानहरूले फेयरफोर्ड एयरबेस प्रयोग गरेका थिए । षड्यन्त्रको अनुसन्धानका क्रममा प्रहरीले सातजनालाई पक्राउ गरे पनि सबैलाई धरौटीमा रिहा गरेको छ । हालसम्म कसैविरुद्ध औपचारिक आरोप तय गरिएको छैन । इरानले षड्यन्त्रमा आफ्नो संलग्नता अस्वीकार गर्दै बेलायतसँग आरोप पुष्टि गर्ने प्रमाण मागेको छ । सेप्टेम्बर २७ मा एयरबेसनजिकैका बासिन्दालाई घरबाट बाहिर निकालिएको थियो । त्यसपछि सशस्त्र प्रहरी र सेनाका बम निष्क्रिय पार्ने विज्ञले ग्रामीण क्षेत्रमा खोजी अभियान चलाएका थिए । सुरुमा पक्राउ परेका पाँच संदिग्धसँग सम्बन्धित तीनवटा भ्यानमा पेट्रोल भेटिएको थियो । तर, ती गाडीमा विस्फोटक पदार्थ फेला परेको थिएन । पक्राउ परेका सातै जना २० देखि २९ वर्ष उमेर समूहका छन् । प्रहरीले उनीहरूको पहिचान सार्वजनिक गरेको छैन । उनीहरूमध्ये ६ जना बेलायती नागरिक र एकजना बेलायत तथा इरान दुवै देशको नागरिकता भएका व्यक्ति रहेको प्रहरीले जनाएको छ । सोमबार बेलायतले इरानी राजदूतलाई बोलाएको थियो । राजदूतले इरानको षड्यन्त्रमा संलग्नता नरहेको दाबी दोहोर्‍याउँदै आरोपको प्रमाण मागेका थिए । बेलायतले इरानका दुई नागरिकलाई प्रतिबन्ध सूचीमा राखेको जनाएको छ । उनीहरूमध्ये एकजना रिभोलुसनरी गार्डको जासुसी अभियानका प्रमुख रहेको बताइएको छ । बेलायती अधिकारीहरूका अनुसार, दुवै जना युरोप र अमेरिकामा इरान सरकारका लागि जासुसी तथा आक्रमण गराउने गतिविधिमा संलग्न थिए । एपीन्यूज