लडेको बेला दिएको साथको धेरै महत्व हुन्छ : गगन थापा

काठमाडौं । नेपाली कांग्रेसका नवनिर्वाचित सभापति गगन थापाले कठिन परिस्थितिमा प्राप्त हुने साथ र सहयोगको महत्व धेरै हुने बताएका छन् । दशैं, तिहार तथा छठ पर्वको अवसरमा शुक्रबार काठमाडौंमा आयोजित शुभकामना आदानप्रदान कार्यक्रममा बोल्दै उनले सहज अवस्थामा साथ दिनेभन्दा अप्ठ्यारोमा साथ दिनेहरूको योगदान विशेष हुने बताएका हुन् । ‘सिधा हिँडिरहेको बेलामा, सजिलोको बेलामा साथ दिनेहरू धेरै हुन्छन्,’ थापाले भने, ‘लडेको बेलामा, ढलेको बेलामा दिने साथको धेरै महत्व हुन्छ ।’ सभापति थापाले आफ्नो राजनीतिक यात्राका क्रममा धेरै पटक कठिन परिस्थिति सामना गर्नुपरेको र आफू लडेको तथा कमजोर बनेको क्षणहरू पनि रहेको स्मरण गरे । ‘म एउटा राजनीतिक कार्यकर्ता हुँ । त्यसैले मेरो राजनीतिक यात्राका क्रममा धेरै पटक लडेको छु, धेरै पटक ढलेको छु,’ उनले भने । आफू कमजोर अवस्थामा पुगेका बेला पनि निरन्तर साथ, शुभेच्छा, आशीर्वाद र स्नेह दिनेहरूप्रति थापाले आभार व्यक्त गरे । ‘म कैयौँ पटक कमजोर हुँदा, तल पर्दा, अप्ठ्यारोमा पर्दै गर्दा मलाई किञ्चित केही नसोचिकन तपाईंहरूको निरन्तर मसँग शुभेच्छा रहेको छ, आशीर्वाद रहेको छ, स्नेह रहेको छ । त्यसका निम्ति मैले बोलेर आभार प्रकट गरेर पुग्दैन,’ उनले भने । थापाले आफूलाई अहिलेको स्थानसम्म पुर्‍याउन शुभेच्छुकहरूको ठूलो योगदान रहेको पनि बताए । आफूले निरन्तर प्राप्त गरेको स्नेह र विश्वासकै कारण वर्तमान अवस्थामा आइपुगेको उल्लेख गर्दै उनले यसमा शुभेच्छुकहरूको महत्वपूर्ण भूमिका रहेको दोहोर्‍याए । ‘तपाईंहरूले निरन्तर स्नेह जुन मलाई गर्नुभएको छ, जुन विश्वास गर्नुभएको छ । म आज जुन ठाउँमा छु, मैले पटक–पटक यो कुरा भनेको छु, फेरि पनि दोहोर्‍याउँछु,’ थापाले भने, ‘यस्तो कुरा दोहोर्‍याउन पनि मन लाग्छ । त्यसमा तपाईंहरूको धेरै ठूलो योगदान छ ।’