अर्काको नामबाट अख्तियारमा झुठा उजुरी दिनेलाई जरिबाना

काठमाडौं । अख्तियार दुरुपयोग अनुसन्धान आयोगमा अर्कै व्यक्तिको नाम र हस्ताक्षर प्रयोग गरी झुठा उजुरी दिएको पुष्टि भएपछि रुकुम पश्चिमका एक व्यक्तिलाई २ हजार रुपैयाँ जरिबाना गरिएको छ । आयोगले रुकुम पश्चिमको आठबिसकोट नगरपालिका–५ का दीपक पुन मगरलाई भ्रष्टाचार निवारण ऐन, २०४८ को दफा ४९ लगायत प्रचलित कानुनबमोजिम जरिबाना गरेको हो । आयोगले बिहीबार जारी गरेको विज्ञप्तिमा मगरले अर्कै व्यक्तिको नामबाट झुठा उजुरी दिएको तथ्य पुष्टि भएको जनाएको छ । आयोगमा एबी राई (आङबाबु राई)का नामबाट नेपाल प्रहरीका डीआईजी बताउने एक व्यक्तिले आफू अध्यक्ष रहेको सहकारीबाट ऋण लिएको भन्दै उजुरी परेको थियो । उक्त उजुरीमा आफूविरुद्ध परेका उजुरी मिलाइदिने भन्दै ती डीआईजीले ४० लाख रुपैयाँमध्ये १५ लाख नगद र कान्छी श्रीमतीको नाममा थप रकम लिएको तथा धम्की दिएर रकम मागेको आरोप लगाइएको थियो । उजुरीमाथि अनुसन्धान गर्दा एबी राईले आफूले उजुरी नदिएको र त्यसमा रहेको हस्ताक्षर पनि आफ्नो नभएको बयान दिएका थिए । थप अनुसन्धानका क्रममा आठबिसकोट नगरपालिका–५ का मगरले २०८३ असार १७ गते आयोगसमक्ष उक्त उजुरी आफूले नै एबी राईको नामबाट दिएको स्वीकार गरेको आयोगले जनाएको छ । मगर र आङबाबु राई दुवैले त्यस्तो कुनै घटना नभएको, आफूलाई कसैले धम्की नदिएको र मुद्दा मिलाइदिने भन्दै रकमसमेत नमागिएको बयान दिएका थिए । त्यसपछि राईको नाम र हस्ताक्षर प्रयोग गरी उनलाई दुःख तथा हैरानी दिने बदनियतले मगरले झुठा उजुरी दिएको पुष्टि भएको आयोगले जनाएको छ ।