काठमाडौंका सडकमा रातभर रोड मार्किङ, मुख्य सडकको काम दशैँअघि सकिने

<p>काठमाडौंका सडकमा ट्राफिक व्यवस्थापन सहज र आवागमन सुरक्षित बनाउन सडक डिभिजन काठमाडौंले रोड मार्किङ तथा ट्राफिक संकेत निर्माणको काम तीव्र पारेको छ ।</p> <p>दिउँसो सवारीसाधनको चाप बढी हुने भएकाले सडकमा थर्मोप्लास्टिक पेन्टिङसहितका चिह्न निर्माणको काम रातिको समयमा भइरहेको छ । सडक डिभिजन काठमाडौंकी इन्जिनियर श्रीयंका रौनियारका अनुसार राति ९ बजेदेखि बिहान ५–६ बजेसम्म सडकमा मार्किङ गर्ने काम भइरहेको छ ।</p> <p>हाल सिंहदरबार आसपासका क्षेत्रमा सडक चिह्न निर्माण भइरहेको छ भने कालिमाटी क्षेत्रमा जेब्रा क्रसिङ बनाउने काम जारी छ । त्यस्तै, करिब ६ किलोमिटर सडकमा एज लाइन निर्माणको काम सम्पन्न भइसकेको रौनियारले जानकारी दिइन् ।</p> <p>सडकको प्रकृति र सुरक्षालाई ध्यानमा राखेर एज लाइनमा पहेँलो तथा सेन्टर लाइन र जेब्रा क्रसिङमा सेतो रङको थर्मोप्लास्टिक पेन्ट प्रयोग भइरहेको उनले बताइन् । स्पष्ट सडक चिह्नले चालकलाई लेन पहिचान गर्न र पैदलयात्रीलाई सुरक्षित रूपमा सडक पार गर्न सहज बनाउने उनको भनाइ छ ।</p> <p>‘काठमाडौंका सडकहरू दिउँसो निकै व्यस्त हुने भएकाले सडक सुरक्षा तथा सडक चिह्नसम्बन्धी काम रातिको समयमा गर्ने गरेका छौँ । हामी करिब राति ८ बजेदेखि नै तयारीमा जुट्छौँ र ९ बजेदेखि काम सुरु हुन्छ,’ रौनियारले भनिन् ।</p> <p>उनका अनुसार काठमाडौंका मुख्य सडकमा दशैंअघि नै रोड मार्किङको काम सम्पन्न गर्ने लक्ष्य राखिएको छ । दशैं र तिहारको बीचमा अन्य सडकमा समेत मार्किङको कामलाई निरन्तरता दिइनेछ ।</p> <p>काठमाडौंका सडकमा ट्राफिक संकेत, सडक मार्किङ तथा अन्य सडक सुरक्षा पूर्वाधार निर्माणका लागि सडक डिभिजन काठमाडौंले के.ए.एम./रुवी/अयान जेभीसँग ठेक्का सम्झौता गरेको छ । सम्झौताअनुसार आयोजनाका लागि भ्याटसहित ७ करोड १५ लाख ५३ हजार २८३ रुपैयाँको बोलपत्र स्वीकृत भएको छ ।</p> <p>२०८३ असार २६ गतेदेखि सुरु भएको आयोजनाको काम २०८३ चैत २५ गतेसम्म सम्पन्न गर्नुपर्ने सम्झौतामा उल्लेख छ ।</p> <p>सडकमा आवश्यक ट्राफिक संकेत, लेन चिह्न, जेब्रा क्रसिङ तथा अन्य सुरक्षा संरचना निर्माण भएपछि सवारीसाधन र पैदलयात्रीको आवागमन थप व्यवस्थित र सुरक्षित हुने सडक डिभिजन काठमाडौंको अपेक्षा छ ।</p>