निसर्ग वाटिका एनएसए कप पौडीमा च्याम्पियन

विभागीय टोली पछि पार्दै निसर्ग वाटिका स्कुलले १४ औं एनएसए कप पौडी प्रतियोगिताको उपाधि जितेको छ । नेपाल पौडी संघको आयोजनामा मंगलबार सम्पन्न दुईदिने प्रतियोगितामा निसर्ग वाटिका सर्वाधिक एक हजार ३६३ अंक जोड्दै च्याम्पियन भएको हो । सातदोबाटोस्थित पौडी पोखरीमा भएको प्रतियोगितामा एपिएफ क्लव दोस्रो र जेम्स स्कुल तेस्रो भए । एपिएफका ६ सय १३ अंक जोड्दा जेम्स स्कुलले ६ सय ६ अंक बटुल्यो । जेम्स स्कुलले सर्वाधिक आठ स्वर्ण, दुई रचत र चार काँस्य पदक जित्यो । यद्यपि पौडीमा अक्वा पोइन्टको आधारमा विजेता घोषणा हुने भएकाले निसर्ग च्याम्पियन बन्यो । नेपाल आर्मी त्रिभूवन आर्मी क्लव चौथो स्थानमा रह्यो । आर्मीले पाँच सय ५४ अंक जोड्यो । पदकतालिकामा भने आर्मी दोस्रो स्थानमा रह्यो । आर्मीले सात स्वर्ण, दुई रजत र ६ कांस्य पदक जित्यो । च्याम्पियन निसर्ग बाटिका पदक तालिकामा तेस्रो स्थान भयो । निसर्गले पाँच स्वर्ण, सात रजत र आठ काँस्य जित्यो । सगरमाथा स्विम क्लव तीन सय १५ अंकसहित पाँचौं भयो । कोशी प्रदेश दुई सय ३४ अंकसहित छैटौं र नेपाल पुलिस क्लब एक सय ८४ अंकसहित सातौं स्थानमा रहे । प्रतियोगितामा डुवाना लामा र इरभिन श्रेष्ठ उत्कृष्ट खेलाडी घोषित भए । डुवानाले सात स्वर्ण पदक जित्दा इरभिनले चार स्वर्ण र दुई रजत पदक हात पारे । उत्कृष्ट खेलाडी दुवैले समान २५ हजार रुपैयाँ नगद पुरस्कार र ट्रफी प्राप्त गरे । दुई दिनसम्म चलेको प्रतियोगितामा कुल १७ राष्ट्रिय कीर्तिमान बने । नेपाल पौडी संघले प्रत्येक राष्ट्रिय कीर्तिमान बनाउने खेलाडीलाई पाँच हजार रुपैयाँका दरले नगद पुरस्कार प्रदान गरेको थियो । प्रतियोगितामा महिला खेलाडीतर्फ डुवानाले मात्रै राष्ट्रिय कीर्तिमान बनाइन् । बाँकी १६ राष्ट्रिय कीर्तिमान पुरुष खेलाडीका नाममा रहे । प्रतियोगितामा ३६ टोलीका एक सय ५१ खेलाडीले ३८ स्वर्ण पदकका लागि प्रतिष्पर्धा गरेका थिए । कोशी प्रदेश, नेपाल पुलिस क्लब र आइरनफिन स्पोट्र्स क्रमशः छैटौं, सातौं र आठौं स्थानमा रहे । प्रतियोगिताका विजेता तथा उत्कृष्ट खेलाडीलाई राष्ट्रिय खेलकुद परिषद् (राखेप) का सदस्यसचिव रामचरित्र मेहेता, नेपाल पौडी संघका अध्यक्ष जगतमान श्रेष्ठ र महासचिव ईश्वर कार्कीलगायतले पुरस्कार वितरण गरे ।